صوابی (حق نواز خان)
صوابی میں نامعلوم افراد کی فائرنگ کے نتیجے میں قیمتی جان کے ضیاع اور بے گناہ راہ گزر مولانا حافظ آفتاب احمد کی شہادت کے خلاف صوابی کے عوام سڑکوں پر نکل آئے اور شدید احتجاج کیا۔
تفصیلات کے مطابق صوابی میں جماعت اسلامی کے سابق امیدوار منظور خان پر فائرنگ کی گئی، جس کے نتیجے میں راہ گزر مولانا حافظ آفتاب گولی کا نشانہ بننے کی وجہ سے موقع پر ہی شہید ہو گئے۔ واقعہ کے بعد مشتعل عوام نے مولانا حافظ آفتاب احمد کی میت امن چوک صوابی میں رکھ کر شدید احتجاجی مظاہرہ کیا۔
مظاہرے کی قیادت صدر اصلاحی جرگہ جانزیب خان، عبدالصمد حقانی اور دیگر مشران نے کی، جبکہ اس موقع پر بڑی تعداد میں مقامی عوام بھی موجود تھے۔
احتجاجی مظاہرین نے دوٹوک الفاظ میں مطالبہ کیا کہ:
-
مولانا حافظ آفتاب کے قتل میں ملوث تمام ملزمان کو فوری طور پر گرفتار کیا جائے۔
-
اس افسوسناک واقعے میں غفلت برتنے والے پولیس اہلکاروں کے خلاف سخت محکمانہ کارروائی عمل میں لائی جائے۔
مظاہرین کے شدید دباؤ پر ڈی ایس پی صوابی امتیاز خان نے ڈی پی او صوابی وقاص رفیق کی ہدایت پر موقع پر پہنچ کر عوامی مطالبات تسلیم کیے اور صرف تین دن کا وقت مانگتے ہوئے یقین دہانی کرائی کہ "آپ کو تین دن کے اندر رزلٹ دکھا دوں گا۔”
عوامی حلقوں کی جانب سے اس یقین دہانی کو فی الحال سنجیدگی سے لیا گیا ہے اور صوابی پولیس کے پاس اب تین دن کا وقت ہے۔ عوام اور شہداء کے لواحقین امید کرتے ہیں کہ ڈی پی او صوابی وقاص رفیق کی قیادت میں پولیس عملی اقدامات اٹھائے گی اور اس اندوہناک واقعے کے ذمہ داروں کو قانون کے کٹہرے میں لائے گی۔
تاہم، مشران اور عوام نے واضح کر دیا ہے کہ اب مزید جھوٹی تسلیاں اور روایتی وعدے برداشت نہیں کیے جائیں گے، اور تین دن کی مدت پوری ہونے کے بعد عوام کو واضح اور عملی نتائج درکار ہوں گے۔
شہید مولانا آفتاب احمد صرف ایک خاندان کا نہیں بلکہ پورے صوابی کا سانحہ اور نقصان ہیں۔ وہ ایک دینی شخصیت، مسجد کے پیش امام اور ایک پرامن شہری تھے۔ صوابی کے عوام کا ایک ہی مطالبہ ہے کہ ہمیں ہر صورت انصاف چاہیے، قاتلوں کی گرفتاری چاہیے اور غفلت کے ذمہ داروں کا ک احتساب چاہیے۔
