اسلام آباد،راولپنڈی سمیت بالائی علاقوں میں تیز ہواؤں اور گرج چمک کے ساتھ بارش، مری،گلیات پر برفباری کی پیشگوئی

اسلام آباد: محکمہ موسمیات نے جڑواں شہروں اسلام آباد اور راولپنڈی سمیت ملک کے بالائی علاقوں میں موسم کی تبدیلی کا الرٹ جاری کرتے ہوئے آئندہ 2 سے 3 روز کے دوران تیز ہواؤں، گرج چمک کے ساتھ بارش اور پہاڑی علاقوں میں برفباری کی پیشگوئی کی ہے۔
محکمہ موسمیات کے مطابق مغرب سے آنے والا ہوائی سلسلہ ملک کے بالائی اور شمالی علاقوں میں داخل ہو رہا ہے، جس کے باعث پنجاب کے بالائی حصوں، خیبر پختونخوا، آزاد کشمیر اور گلگت بلتستان میں موسم سرد اور ابر آلود رہنے کا امکان ہے۔اسلام آباد، راولپنڈی، مری، گلیات، اٹک، جہلم اور چکوال سمیت خیبر پختونخوا کے مختلف اضلاع میں تیز ہوائیں چلنے اور گرج چمک کے ساتھ وقفے وقفے سے بارش متوقع ہے۔مری، گلیات، ناران، کاغان، سوات، ہنزہ، اور آزاد کشمیر کے بلند پہاڑی سلسلوں پر آئندہ 48 سے 72 گھنٹوں کے دوران سال کی پہلی باقاعدہ برفباری کا امکان ظاہر کیا گیا ہے۔بارش اور برفباری کے اس نئے سلسلے کی وجہ سے میدانی اور پہاڑی علاقوں میں درجہ حرارت میں نمایاں کمی آئے گی جس سے سردی کی شدت میں اضافہ ہو جائے گا۔
محکمہ موسمیات نے سیاحوں اور بالائی علاقوں کا سفر کرنے والے شہریوں کو ہدایت کی ہے کہ وہ سفر سے قبل موسمی صورتحال سے باخبر رہیں اور غیر ضروری نقل و حرکت سے گریز کرتے ہوئے احتیاطی تدابیر اختیار کریں۔