ڈسکہ :عدالت نے بدنام زمانہ ٹک ٹاکر مسٹر پتلو اور اس کے بھائی کاشف کی عبوری ضمانت کی درخواستیں خارج کر دی ۔جسمانی ریمانڈ کیلئے عدالت پیش کردیا گیا
ڈسکہ کی مقامی عدالت میں فراز گراؤنڈ سانحہ سے جڑے مقدمے کی سماعت ہوئی، جہاں عدالت نے ٹک ٹاکر محمد انصر عرف مسٹر پتلو اور اس کے بھائی کاشف کی عبوری ضمانتیں عدم حاضری اور عدم پیروی کی بنیاد پر خارج کر دیں۔ذرائع کے مطابق دونوں ملزمان نے تھانہ موترہ میں درج مقدمہ نمبر 1335/26 میں عبوری ضمانت حاصل کر رکھی تھی جس کی مدت آج ختم ہو رہی تھی، تاہم مقررہ وقت پر عدالت میں پیش نہ ہونے کے باعث عدالت نے ضمانتیں خارج کرنے کا حکم سنایا۔قانونی ماہرین کے مطابق عبوری ضمانتیں خارج ہونے کے بعد اب تھانہ موترہ پولیس کو بھی دونوں ملزمان کی باقاعدہ گرفتاری کا قانونی اختیار مل گیا ہے، جبکہ دوسری جانب متاثرہ خاندان کو دھمکیاں دینے کے نئے مقدمے میں گرفتار مسٹر پتلو کو تھانہ صدر پولیس کی جانب سے جسمانی ریمانڈ کے حصول کے لیے آج عدالت میں پیش کیا گیا،
واضح رہے کہ یہ مقدمہ جاں بحق محمد ریحان کے بہنوئی ابوبکر کی درخواست پر تھانہ صدر ڈسکہ میں درج کیا گیا تھا، جس میں ملزم پر صلح کے لیے دباؤ ڈالنے اور سنگین نتائج کی دھمکیاں دینے کا الزام عائد کیا گیا ہے۔
جہاں ایک طرف مدعی فریق اور پولیس قانونی تفتیش کو آگے بڑھا رہے ہیں، وہیں دوسری جانب ملزم کے حامیوں اور ذرائع کا موقف ہے کہ یہ مقدمہ خود ساختہ ہے، جبکہ پولیس حکام نے اعادہ کیا ہے کہ دورانِ تفتیش تمام طبی و قانونی پہلوؤں کو مدنظر رکھتے ہوئے انصاف کے تقاضے پورے کیے جائیں گے۔