عوام کی امانت میں خیانت نہیں کرنے دینگے، مریم نواز کرپٹ وزرا ، افسران کے حلق سے عوام کا حق نکال کر لائے گی، وزیراعلیٰ پنجاب

    لاہور:وزیراعلیٰ پنجاب مریم نواز شریف نے کہا ہے کہ جو بھی عوام کی امانت میں خیانت کرے گا، وہ اس کے حلق سے عوام کا حق نکال کر لائیں گی اور کرپٹ وزراء یا افسران کو کسی صورت نہیں بخشا جائے گا۔


    جہلم میں سکالرشپ اور لیپ ٹاپ تقسیم کرنے کی تقریب سے خطاب کرتے ہوئے انہوں نے کہا کہ اللہ تعالیٰ کو حاضر ناظر جان کر کہتی ہوں اگر عوام کی امانت میں خیانت کا کوئی ثبوت سامنے آئے تو میں خود جوابدہ ہوں، اگر میرے کسی وزیر کے خلاف رشوت یا کرپشن کی شکایت ثبوت کے ساتھ سامنے آئی تو اسے ہرگز نہیں بخشا جائے گا، میں نے کبھی یہ دعویٰ نہیں کیا کہ پنجاب سے کرپشن مکمل ختم ہو گئی لیکن پنجاب وہ واحد صوبہ ہے جہاں کی وزیراعلیٰ روزانہ کرپشن کا کیس پکڑتی اور اس کا تعاقب کرتی ہے، حکومت کے کئی ہزار ارب روپے کے منصوبوں میں ایک روپے کی کرپشن ثابت کر کے دکھائی جائے۔


    مریم نواز نے کہا کہ جیسے جیسے الیکشن قریب آ رہے ہیں، کئی لوگوں کو تکلیف ہونا شروع ہو گئی ہے، ایسے لوگ جہاں سے اٹھ کر آئے ہیں سب پتہ ہے اور وہ صرف اپنی اگلی بار کے لیے جگہ پکی کر رہے ہوتے ہیں، اگر تم لوگوں کو اتنا اعتراض ہے تو اس حکومت کے اندر منسٹر بن کر کیوں بیٹھے ہوئے ہو؟ استعفیٰ کیوں نہیں دیتے اور گھر کیوں نہیں جاتے؟ جن کی پوری پرورش اس ماحول میں ہوئی ہے کہ کتنی رشوت، کٹ اور کمیشن لینا ہے، آج وہ بھاگ کر باہر بیٹھے باتیں کرتے ہیں تو کسی کی عقل نہیں مانتی۔


    انہوں نے سوال اٹھایا کہ کیا سندھ، بلوچستان اور خیبرپختونخواہ میں کرپشن نہیں ہے؟ خیبرپختونخواہ میں تو کرپشن کا پورا ایک نیٹ ورک قائم تھا، آج پنجاب کے نوجوانوں کے ہاتھوں میں پٹرول بم یا پتھر نہیں بلکہ لیپ ٹاپس ہیں، یہاں کی وزیراعلیٰ مظلوم کے ساتھ کھڑی ہوتی ہے، ایک خاتون کو دکان میں ایک شخص نے تھپڑ مارا تو میں نے متاثرہ خاتون کو تھانے بلا کر کہا کہ اس کے منہ پر زوردار تھپڑ مارو۔


    تقریب کے دوران تعلیمی منصوبوں کا ذکر کرتے ہوئے وزیراعلیٰ نے بتایا کہ جہلم کی سرکاری یونیورسٹی کے 115 طلبا اور نرسنگ کالج کی 42 طالبات میں لیپ ٹاپس تقسیم کیے گئے ہیں، جب کہ 109 طلبہ کو تقریباً 25 لاکھ روپے کے ہونہار سکالرشپس دیئے گئے ہیں، لیپ ٹاپ، فون اور سکالرشپس طلبہ کا حق ہیں اور یہ ان کی محنت کا صلہ ہے، تعلیم پر سرمایہ کاری دراصل قوم کے مستقبل پر سرمایہ کاری ہے اور ہر بچہ پاکستان کا روشن مستقبل ہے۔


    طالبات کو فراہم کی جانے والی سکوٹیز کے حوالے سے مریم نواز نے ہدایت کی کہ وہ اپنی حفاظت کے لیے ہیلمٹ لازمی پہنیں کیونکہ والدین نے انہیں بہت محبت سے پالا ہے، بچیوں کو مکمل ڈرائیونگ ٹریننگ بھی دی جائے گی، جب کہ بڑی تعداد میں سکوٹیز کی تیاری کے باعث تقسیم میں تاخیر ہوئی تاہم بہت جلد پہلی قسط کی تقسیم شروع ہو جائے گی، نوجوان گمراہ کن باتوں کے بجائے حقائق کا ادراک کریں اور اپنی قابلیت کے ذریعے ملک کی ترقی میں فعال کردار ادا کریں۔

    Related Posts