سیالکوٹ (بیورو رپورٹ — سلیم احمد اعوان شیخو)
سیالکوٹ میں عدالت کے احاطے سے ڈکیتی کے مقدمے میں نامزد دو ملزمان کے پولیس حراست سے فرار ہونے کا بڑا واقعہ پیش آیا ہے، جس پر سخت نوٹس لیتے ہوئے ذمہ دار پولیس اہلکاروں کے خلاف مقدمہ درج کر لیا گیا ہے۔
تفصیلات کے مطابق تھانہ اگوکی کے مقدمہ ڈکیتی میں ملوث دو ملزمان، احمد ندیم اور محمد کاشف، کو علاقہ مجسٹریٹ کی عدالت میں پیش کیا گیا تھا۔ عدالت میں پیشی کے دوران دونوں ملزمان مبینہ طور پر پولیس حراست کو چکمہ دے کر فرار ہونے میں کامیاب ہو گئے۔
واقعے کا سختی سے نوٹس لیتے ہوئے ڈسٹرکٹ پولیس آفیسر (ڈی پی او) سیالکوٹ کیپٹن (ر) دوست محمد کے حکم پر تھانہ اگوکی میں فوری قانونی کارروائی عمل میں لائی گئی۔ اس سلسلے میں مقدمے کے تفتیشی افسر سب انسپکٹر محمد ارشد اور نائب کورٹ محسن کے خلاف غفلت برتنے کی دفعات کے تحت مقدمہ درج کر لیا گیا ہے۔
ذرائع کے مطابق دونوں ملزمان کو ایک مقدمے میں عدالت کی طرف سے ڈسچارج کر کے رہا کیا گیا تھا، جبکہ وہ دوسرے سنگین مقدمے میں بھی مطلوب تھے اور اسی دوران یہ افسوسناک واقعہ پیش آیا۔ پولیس کی جانب سے مفرور ملزمان کی گرفتاری کے لیے چھاپے مارے جا رہے ہیں اور مزید تفتیش جاری ہے۔