سیالکوٹ (بیورو رپورٹ: سلیم احمد اعوان شیخو)
پنجاب بھر میں بڑھتی ہوئی فضائی آلودگی اور سموگ نے معمولات زندگی کو شدید متاثر کرنا شروع کر دیا ہے۔ صوبہ پنجاب کے نئے جاری کردہ ماحولیاتی سروے کے مطابق، صوبے کے آلودہ ترین شہروں کی فہرست میں اب صنعتی شہر سیالکوٹ کا نام بھی شامل ہو گیا ہے، جو آلودگی کے لحاظ سے اب پانچویں نمبر پر آ گیا ہے۔
سروے رپورٹ کے مطابق، آلودگی کے اس بڑھتے ہوئے بحران میں گوجرانولہ پہلے نمبر پر موجود ہے، جبکہ صوبائی دارالحکومت لاہور دوسرے نمبر پر ہے۔ اس کے علاوہ فیصل آباد تیسرے اور ملتان چوتھے آلودہ ترین شہر کے طور پر سامنے آئے ہیں۔
ماہرینِ ماحولیات نے بڑھتی ہوئی آلودگی پر شدید تشویش کا اظہار کرتے ہوئے شہریوں کو احتیاطی تدابیر اختیار کرنے، غیر ضروری سفر سے گریز کرنے اور چہرے کو ڈھانپنے کی ہدایت کی ہے، جبکہ متعلقہ اداروں سے فوری انسدادی اقدامات اٹھانے کا مطالبہ بھی کیا جا رہا ہے۔