ٹنڈوالہیار (رپورٹ: تیمور رضا قائم خانی)
27 اکتوبر مقبوضہ کشمیر پر بھارتی تسلط کے خلاف یومِ سیاہ منانے کے سلسلے میں ڈپٹی کمشنر ٹنڈوالہیار نور مصطفیٰ لغاری کی ہدایت پر ضلع بھر میں کشمیری عوام سے اظہارِ یکجہتی کے لیے ریلیاں نکالی گئیں اور مختلف پروقار تقریبات کا انعقاد کیا گیا۔اس سلسلے میں ٹنڈوالہیار میں ایڈیشنل ڈپٹی کمشنر ون آصف علی خاصخیلی کی قیادت میں سید مرتضیٰ شاہ ڈاڈاہی بلدیہ ہال سے پریس کلب ٹنڈوالہیار تک ایک بڑی ریلی نکالی گئی۔ جبکہ تعلقہ چمبڑ میں اسسٹنٹ کمشنر حماد علی زرداری اور تعلقہ جھنڈومری میں اسسٹنٹ کمشنر شہزادو عمیر جروار کی قیادت میں بھی ریلیاں نکالی گئیں۔ٹنڈوالہیار کی مرکزی ریلی میں اسسٹنٹ کمشنر ٹنڈوالہیار بابر صالح راہپوٹہ، ڈسٹرکٹ انفارمیشن آفیسر علی مراد پتافی، محکمہ تعلیم، صحت، لائیو اسٹاک، سوشل ویلفیئر، بلدیہ اور دیگر محکموں کے ضلعی افسران، صحافیوں، علمائے کرام، سرکاری و غیر سرکاری اسکولوں کے طلبہ و طالبات اور زندگی کے مختلف شعبوں سے تعلق رکھنے والے افراد نے بڑی تعداد میں شرکت کی۔ریلی سے خطاب کرتے ہوئے ایڈیشنل ڈپٹی کمشنر ون ٹنڈوالہیار آصف علی خاصخیلی نے کہا کہ 27 اکتوبر کشمیر کی تاریخ کا ایک سیاہ دن ہے، جب 1947 میں بھارتی افواج سری نگر میں داخل ہوئیں اور مقبوضہ کشمیر پر غیر قانونی تسلط قائم کیا۔ انہوں نے کہا کہ بھارت آج بھی اقوام متحدہ کی سلامتی کونسل کی قراردادوں کے مطابق کشمیری عوام کے حقِ خودارادیت کو تسلیم کرنے سے گریزاں ہے، تاہم کشمیری عوام کی قربانیاں کبھی رائیگاں نہیں جائیں گی اور وہ دن دور نہیں جب وہ اپنے حقِ خودارادیت کے حصول میں کامیاب ہوں گے۔تعلقہ چمبڑ میں نکالی گئی ریلی سے خطاب کرتے ہوئے اسسٹنٹ کمشنر حماد علی زرداری نے کہا کہ پاکستانی قوم اپنے کشمیری بھائیوں کے دکھ درد میں برابر کی شریک ہے اور مقبوضہ کشمیر میں انسانی حقوق کی سنگین خلاف ورزیوں کی شدید مذمت کرتی ہےتعلقہ جھنڈومری میں اسسٹنٹ کمشنر شہزادو عمیر جروار نے خطاب کرتے ہوئے کہا کہ 1947 کا یہ دن کشمیری عوام کی امنگوں اور بین الاقوامی اصولوں کے خلاف ایک افسوس ناک واقعہ تھا۔ انہوں نے مطالبہ کیا کہ بھارت کشمیریوں پر ظلم و ستم بند کرے اور اقوام متحدہ کی قراردادوں پر عمل درآمد کرتے ہوئے مقبوضہ کشمیر سے اپنا جبری تسلط ختم کرے۔ ریلیوں کے اختتام پر مقبوضہ کشمیر میں بھارتی مظالم کے نتیجے میں شہید ہونے والے کشمیریوں کے ایصالِ ثواب کے لیے خصوصی دعائیں کی گئیں۔ علاوہ ازیں ضلع بھر کے تمام سرکاری و غیر سرکاری اسکولوں میں بھی یومِ سیاہ کشمیر کے سلسلے میں مختلف تقاریب منعقد کی گئیں، جن میں طلبہ و طالبات نے تقاریر اور ٹیبلوز پیش کرکے کشمیری عوام کے ساتھ بھرپور اظہارِ یکجہتی کیا۔
