سانگھڑ (رپورٹ: اشفاق سلہری)
سانگھڑ میں پولیس اور مبینہ ملزمان کے درمیان فائرنگ کا شدید تبادلہ ہوا ہے، جس کے نتیجے میں ٹنڈو آدم کا رہائشی ایک ملزم زخمی حالت میں گرفتار ہو گیا ہے، جسے مبینہ طور پر ’ہاف فرائی‘ قرار دیا جا رہا ہے۔پولیس ذرائع کے مطابق واقعہ پیر کورل روڈ کے قریب پیش آیا، جہاں ڈکیتی یا جرائم کی نیت سے گھات لگائے بیٹھے مسلح ملزمان نے روٹین گشت پر مامور پولیس پارٹی پر اچانک اندھا دھند فائرنگ شروع کر دی۔ پولیس کی جانب سے فوری اور بھرپور جوابی کارروائی کی گئی، جس کے نتیجے میں فائرنگ کے اس تبادلے میں ایک ملزم ریاض تھہیم زخمی حالت میں دبوچ لیا گیا۔پولیس کا کہنا ہے کہ گرفتار ملزم کے دو دیگر ساتھی، جن کی شناخت منظور خاصخیلی اور ارشد کلوئی کے نام سے ہوئی ہے، اندھیرے اور موقع کی مناسبت سے فرار ہونے میں کامیاب ہو گئے ہیں۔ پولیس نے گرفتار ملزم کے قبضے سے ایک پسٹل بھی برآمد کر لیا ہے، جبکہ مفرور ملزمان کی گرفتاری کے لیے علاقے میں ناکہ بندی کر کے سرچ آپریشن شروع کر دیا گیا ہے۔