صوابی (حق نواز خان)
تھانہ ٹوپی پولیس نے پیشہ ورانہ صلاحیتوں کو بروئے کار لاتے ہوئے ایک اور اہم اندھے قتل کا معمہ حل کر لیا ہے۔ پولیس نے تربیلہ ڈیم چائینہ کیمپ میں تعینات ڈرائیور صابر حسین کے قتل میں مبینہ طور پر ملوث مرکزی ملزم کو گرفتار کر لیا ہے۔صابر حسین ولد حفیظ اللہ، جن کا تعلق صوبہ سندھ کے ضلع جیکب آباد سے تھا اور وہ تربیلہ ڈیم چائینہ کیمپ میں بطور ڈرائیور فرائض انجام دے رہے تھے۔پولیس نے تفتیش کے دوران جدید تقاضوں کو اپناتے ہوئے قتل میں ملوث مرکزی ملزم عدنان ولد نثار سکنہ کوٹھا تک رسائی حاصل کی اور اسے دبوچ لیا۔ ابتدائی اطلاعات کے مطابق ملزم نے اجرت پر یہ قتل کیا تھا۔ ڈی پی او صوابی وقاص رفیق کی خصوصی ہدایات پر ڈی ایس پی سرکل ٹوپی نیاز گل خان کی قیادت میں ایس ایچ او تھانہ ٹوپی فواد خان اور تفتیشی افسر ایوب خان نے اس کارروائی کو کامیابی سے پایہ تکمیل تک پہنچایا۔ ابتدائی تفتیش کے مطابق قتل کی اصل وجہ مستورات کے معاملے پر تنازعہ بتائی جاتی ہے۔پولیس نے واقعے کے تمام پہلوؤں کا احاطہ کرتے ہوئے مزید تفتیش شروع کر دی ہے تاکہ اس گھناؤنے جرم میں ملوث دیگر ممکنہ عناصر کو بھی قانون کے کٹہرے میں لایا جا سکے۔