دنیا بھر میں شرح پیدائش میں ریکارڈ کمی: معاشی عدم تحفظ کے باعث نوجوان بچوں سے گریزاں

بین الاقوامی خبر رساں ایجنسی کی رپورٹ کے مطابق دنیا بھر میں شرح پیدائش میں تیزی سے کمی واقع ہو رہی ہے، جبکہ دو تہائی سے زائد ممالک میں زچگی کا تناسب نچلی سطح پر آ گیا ہے۔ اس رجحان کی بنیادی وجہ مختلف ممالک میں جاری معاشی عدم استحکام اور بڑھتی ہوئی مہنگائی کو قرار دیا جا رہا ہے۔رپورٹ کے مطابق نوجوان معاشی عدم تحفظ، مہنگے ہوتے گھروں اور تاخیر سے شادیوں کے باعث بچے پیدا کرنے سے گریز کر رہے ہیں۔ جدید نسل کے ایک بڑے طبقے کا ماننا ہے کہ بچوں کے بغیر زیادہ بہتر اور پُرآسائش زندگی گزاری جا سکتی ہے، کیونکہ پرورش اور تعلیمی اخراجات میں مسلسل اضافہ ہو رہا ہے۔دوسری جانب، یورپی ممالک میں ‘ایک بچے’ پر مشتمل خاندانوں کی تعداد میں دن بہ دن نمایاں اضافہ دیکھا جا رہا ہے، جو اس بات کی نشاندہی کرتا ہے کہ لوگ اب چھوٹے خاندانوں یا بغیر بچوں والی زندگی کو ترجیح دے رہے ہیں۔