سیالکوٹ (سلیم احمد اعوان شیخو)
ڈائریکٹر جنرل ستھرا پنجاب اتھارٹی عمر جاوید نے سیالکوٹ کا تفصیلی دورہ کیا، جہاں انہوں نے پکی کوٹلی اور گوہدپور چوک سمیت مختلف علاقوں میں صفائی کے انتظامات کا جائزہ لیا۔ اس موقع پر ڈپٹی کمشنر سیالکوٹ اویس مشتاق اور اسسٹنٹ کمشنر صفدر شبیر بھی ان کے ہمراہ تھے۔دورے کے دوران ڈی جی ستھرا پنجاب اتھارٹی نے فیلڈ میں جاری صفائی آپریشن کا معائنہ کیا اور مقامی شہریوں سے صفائی کی صورتحال کے بارے میں براہِ راست معلومات حاصل کیں۔ انتظامیہ کی جانب سے انہیں سیالکوٹ میں ویسٹ مینجمنٹ کے اقدامات، مستقل ویسٹ پوائنٹس کے خاتمے اور جاری آپریشنز پر تفصیلی بریفنگ دی گئی۔ڈی جی عمر جاوید نے پکی کوٹلی میں جاری صفائی کارروائیوں کو متاثر کن قرار دیتے ہوئے ڈپٹی کمشنر اویس مشتاق کی ذاتی نگرانی اور رات گئے تک فیلڈ میں موجودگی کی تعریف کی۔ انہوں نے گفتگو کرتے ہوئے کہا کہ ویسٹ مینجمنٹ کے نظام کو پائیدار اور مؤثر بنانے کے لیے شہریوں کا تعاون انتہائی ضروری ہے۔ "ستھرا پنجاب” محض ایک روایتی منصوبہ نہیں بلکہ ایک قومی مشن ہے، جس کی کامیابی کا انحصار عوام کی فعال شرکت پر ہے۔ڈپٹی کمشنر سیالکوٹ اویس مشتاق نے بتایا کہ ضلع بھر میں صفائی کے معیار کو بہتر بنانے کے لیے تمام تر وسائل بروئے کار لائے جا رہے ہیں اور افسران و فیلڈ عملہ ہمہ وقت متحرک ہے۔ شہر کو کچرے سے پاک کرنے اور شہریوں کی شکایات کا فوری ازالہ کرنے کے لیے عملی اقدامات جاری ہیں۔ڈی جی ستھرا پنجاب اتھارٹی نے افسران کی فیلڈ میں موجودگی، مؤثر نگرانی اور عوامی شکایات پر فوری کارروائی کے اقدامات کو سراہا۔