ڈی پی او سیالکوٹ کی ہدایات پر تھانہ سٹی پولیس کا باجوہ کالونی میں چھاپہ، شراب کشید و فروخت کرنے والا ملزم موقع پر گرفتار
پسرور (محمد اشفاق)
ڈی پی او سیالکوٹ کیپٹن (ر) دوست محمد اور ڈی ایس پی پسرور سرکل رانا جمیل قیصر کی ہدایت پر ایس ایچ او تھانہ سٹی پسرور سرمد فیاض کی زیرِ نگرانی پولیس ٹیم نے اہم کارروائی کرتے ہوئے 400 لیٹر دیسی شراب اور بھٹی کا سامان برآمد کر کے ایک ملزم کو گرفتار کر لیا۔
تفصیلات کے مطابق ایس ایچ او سرمد فیاض کی قیادت میں پولیس ٹیم نے دورانِ گشت محلہ باجوہ کالونی میں کارروائی کرتے ہوئے شراب کشید و فروخت کرنے والے ملزم محمد اشرف ولد حسن محمد (سکنہ بھلر گاؤں، تحصیل پسرور) کو موقع پر گرفتار کیا۔ پولیس نے ملزم کے قبضہ سے تقریباً 400 لیٹر دیسی شراب، 2 عدد پلاسٹک ڈرم، 2 عدد پلاسٹک گیلن اور 20 عدد پلاسٹک بوتلیں برآمد کر لیں۔
کارروائی کے دوران پولیس نے شراب کشید کرنے والی بھٹی کا مکمل سامان بھی تحویل میں لے لیا، جس میں گیس سلنڈر اور دیگر متعلقہ سامان شامل ہے۔ ملزم کے خلاف تھانہ سٹی پسرور میں مقدمہ درج کر کے مزید قانونی کارروائی شروع کر دی گئی ہے۔
اس موقع پر ڈی پی او سیالکوٹ کیپٹن (ر) دوست محمد نے کہا کہ منشیات اور شراب کا غیر قانونی دھندا کرنے والوں کے خلاف بلا امتیاز کارروائیاں جاری رہیں گی۔ انہوں نے اس عزم کا اعادہ کیا کہ پولیس نسلِ نو کے تحفظ اور معاشرے کو منشیات و نشہ آور اشیاء سے پاک کرنے کے لیے مکمل طور پر پُرعزم ہے۔