پریس کلب خوشاب کے 25 سال مکمل ہونے پر سلور جوبلی تقریب میں شرکت کی دعوت، ملک علی ساول اعوان کی جانب سے دعوت قبول
خوشاب (راجہ نورالہی عاطف سے)
پاکستان پیپلز پارٹی ضلع خوشاب کے ضلعی صدر ملک علی ساول اعوان کو ممبر کوآرڈینیشن کمیٹی ضلع خوشاب نامزد ہونے پر مبارکباد دینے کے لیے پریس کلب خوشاب کے ایک وفد نے صدر پریس کلب شفقت حیات خان کی قیادت میں ان سے خصوصی ملاقات کی۔ اس موقع پر پریس کلب کے وفد نے ملک علی ساول اعوان کو پھولوں کا گلدستہ پیش کیا، جس پر انہوں نے تمام ممبران کا دلی طور پر شکریہ ادا کیا۔
ملاقات کے دوران صدر پریس کلب شفقت حیات خان نے ضلعی صدر کو آگاہ کیا کہ پریس کلب خوشاب کے 25 سال مکمل ہونے پر جلد سلور جوبلی کی تقریب کا انعقاد کیا جا رہا ہے۔ انہوں نے ملک علی ساول اعوان کو اس تقریب میں شرکت کی خصوصی دعوت دی، جسے انہوں نے بخوشی قبول کر لیا۔
اس موقع پر گفتگو کرتے ہوئے ملک علی ساول اعوان نے کہا کہ وہ پاکستان پیپلز پارٹی کی مرکزی قیادت کے وژن کے مطابق ڈسٹرکٹ کوآرڈینیشن کمیٹی میں شمولیت اختیار کر کے نہ صرف عوامی مسائل کو اجاگر کریں گے بلکہ ان کو ترجیحی بنیادوں پر حل کروانے کی بھی حتٰی المقدور کوشش کریں گے۔
پریس کلب خوشاب کے وفد میں صدر شفقت حیات خان کے ہمراہ غلام محمد کھچی، ایم اقبال شاہد، محمد سبطین جعفری، غلام مرتضیٰ ملک، ابرار ذوالفقار، طیب رحمان اور محمد اعظم بھی شامل تھے۔