خوشاب (راجہ نورالٰہی عاطف سے)
چیف آرگنائزر لٹریری اینڈ سپورٹس ایکٹیوٹیز ڈسٹرکٹ خوشاب ملک عبدالغفور آصف بوڑانہ نے میڈیا سے خصوصی گفتگو کرتے ہوئے بتایا ہے کہ آٹھواں سالانہ آل پاکستان پنجابی ،سرائیکی اور اردو محفلِ مشاعرہ کے انتظامات کو حتمی شکل دے دی گئ ہے ، جس میں ملک بھر سے معروف شعراء، ادبی شخصیات اور اہلِ ذوق شرکت کریں گے۔ محفل مشاعرہ میں شعراء کرام اپنا کلام پیش کریں گے، جبکہ ادب و شعر سے وابستہ شخصیات اور شاعری کے شائقین کی بڑی تعداد کی شرکت متوقع ہے۔
انہوں نے بتایا کہ محفلِ مشاعرہ 2 اکتوبر 2026ء بروز جمعہ اور ہفتہ کی درمیانی شب کو رات آٹھ بجے بمقام شاہوالا جنوبی منعقد ہوگی، جس میں متعدد معروف شعراء اپنا کلام پیش کریں گے۔ محفل کے بہترین انتظامات کےلیے بزم سعد شاہوالا جنوبی کے ملک محمد سلیم سعد واگھرہ سمیت دیگر منتظمین و معاونین کی جانب سے خصوصی کاوشیں کی جا رہی ہیں۔
محفل میں مختلف علاقوں سے تعلق رکھنے والے شعراء کی شرکت کے باعث ادبی حلقوں میں خاصا جوش و خروش پایا جا رہا ہے۔ منتظمین نے اہلِ ادب اور شعر و شاعری سے دلچسپی رکھنے والے افراد کو محفل میں شرکت کی دعوت دی ہے۔ منتظمین کا کہنا تھا کہ ادب، شاعری اور مثبت فکری سرگرمیوں کے فروغ کے لیے ایسی محافل کا انعقاد وقت کی اہم ضرورت ہے، کیونکہ یہ محافل معاشرے میں علمی و ادبی ذوق کو پروان چڑھانے میں اہم کردار ادا کرتی ہیں۔