ٹانک (بیورو رپورٹ)
ٹانک پولیس نے جرائم پیشہ عناصر کے خلاف کارروائیوں کا سلسلہ مزید تیز کرتے ہوئے اقدامِ قتل، بھتہ خوری اور فائرنگ کی سنگین وارداتوں میں مبینہ طور پر ملوث خطرناک ملزم بن یامین ولد عمر خطاب، قوم بیٹنی، سکنہ کڑی جانکی کو گرفتار کرلیا۔
پولیس کے مطابق گرفتار ملزم نے دورانِ تفتیش متعدد سنگین وارداتوں سے متعلق اہم انکشافات کیے ہیں، جن کی روشنی میں مزید تفتیش کا دائرہ وسیع کردیا گیا ہے۔
ایک لاکھ بھتہ، انکار پر فائرنگ اور مبینہ وصولی
پولیس کے مطابق ملزم نے پٹھان کوٹ کے رہائشی علاؤالدین خان سے مبینہ طور پر ایک لاکھ روپے بھتہ طلب کیا۔ رقم دینے سے انکار پر مبینہ طور پر فائرنگ کی گئی، جبکہ بعد ازاں بھتہ وصول کیے جانے کا بھی انکشاف سامنے آیا ہے۔
تفتیش کے دوران ایک اور اہم انکشاف کے مطابق پٹھان کوٹ تا ڈیری اباخیل روڈ کی تعمیر کے سلسلے میں ولی خان سے مبینہ طور پر ایک لاکھ روپے بھتہ طلب کیا گیا، تاہم رقم نہ دینے پر ڈمپر گاڑی کو فائرنگ کرکے نقصان پہنچانے کا الزام بھی سامنے آیا ہے۔
پولیس کے مطابق ملزم نے اپنے ساتھی عالمشیر کے ہمراہ جانکی کے رہائشی وحید اللہ پر فائرنگ کرکے اسے زخمی کرنے کا بھی اعتراف کیا ہے۔
ڈی پی او عبدالصمد کی قیادت میں جرائم پیشہ عناصر کے خلاف کارروائیاں تیز
ٹانک پولیس کی حالیہ کارروائیوں کو شہری حلقوں کی جانب سے سراہا جا رہا ہے۔ ڈی پی او ٹانک عبدالصمد کی قیادت میں جرائم پیشہ عناصر، بھتہ خوروں اور امن و امان کو نقصان پہنچانے والے عناصر کے خلاف کارروائیوں میں تیزی نظر آ رہی ہے۔
پولیس ذرائع کے مطابق ڈی پی او عبدالصمد کی واضح پالیسی ہے کہ شہریوں کو خوف و ہراس میں مبتلا کرنے والے عناصر کو قانون کی گرفت سے بچنے نہیں دیا جائے گا، جبکہ سنگین مقدمات میں ملوث ملزمان کے خلاف بلاامتیاز کارروائی جاری رکھی جائے گی۔ ڈی ایس پی شریف اللہ اور ایس ایچ او طاؤس خان مٹھی کی کارکردگی قابلِ تحسین اس کارروائی میں ڈی ایس پی شریف اللہ کی نگرانی اور ایس ایچ او تھانہ ایس ایم اے طاؤس خان کی عملی کاوشوں کو بھی اہم قرار دیا جا رہا ہے۔ پولیس ذرائع کے مطابق تھانہ ایس ایم اے کی ٹیم نے ملزم کی گرفتاری اور تفتیش میں پیشہ ورانہ انداز اپناتے ہوئے اہم پیش رفت حاصل کی۔مقامی حلقوں کا کہنا ہے کہ ایس ایچ او طاؤس خان مٹھی کی جرائم پیشہ عناصر کے خلاف متحرک حکمتِ عملی اور دبنگ اندازِ کارروائی علاقے میں امن و امان کے قیام کے لیے مثبت قدم ہے، جبکہ ڈی ایس پی شریف اللہ کی مؤثر نگرانی پولیس آپریشنز کو مزید نتیجہ خیز بنانے میں معاون ثابت ہو رہی ہے۔مزید ساتھی اور سہولت کار بھی شکنجے میں آنے کا امکان پولیس کا کہنا ہے کہ گرفتار ملزم سے مزید تفتیش جاری ہے اور اس کے انکشافات کی روشنی میں دیگر ممکنہ ساتھیوں، سہولت کاروں اور وارداتوں میں ملوث عناصر تک پہنچنے کے لیے کارروائی کی جا رہی ہے۔ٹانک پولیس نے واضح کیا ہے کہ بھتہ خوری، فائرنگ، اقدامِ قتل اور دیگر سنگین جرائم میں ملوث عناصر کے خلاف پولیس کا شکنجہ مزید سخت کیا جائے گا۔ شہریوں کے جان و مال کے تحفظ اور علاقے میں پائیدار امن کے قیام کے لیے کسی قسم کی غفلت یا سمجھوتہ نہیں کیا جائے گا۔