سیالکوٹ۔سلیم احمد اعوان شیخو
صوبائی وزیر محنت و افرادی قوت پنجاب محمد منشاء اللہ بٹ، وزیر مملکت برائے منصوبہ بندی چودھری ارمغان سبحانی، چیئرمین پنجاب لینڈ ریکارڈ اتھارٹی (پلرا) چودھری طارق سبحانی اور سیکرٹری جنرل مسلم لیگ (ن) شجاعت علی پاشا نے چند روز قبل بلوچستان کے علاقہ زیارت میں جامِ شہادت نوش کرنے والے کیپٹن حافظ رانا ضیاء اللہ شہید کے گھر جا کر ان کے والد سے ملاقات کی اور دلی تعزیت و ہمدردی کا اظہار کیا۔
اس موقع پر رہنماؤں نے شہید کیپٹن حافظ رانا ضیاء اللہ کے درجات کی بلندی، مغفرت اور لواحقین کے لیے صبرِ جمیل کی دعا کی۔ انہوں نے شہید کے اہل خانہ کے حوصلے اور وطن عزیز کی خاطر عظیم قربانی دینے پر خراجِ عقیدت بھی پیش کیا۔
محمد منشاء اللہ بٹ نے کہا کہ پاک فوج ملک کی نظریاتی و جغرافیائی سرحدوں کی ضامن ہے اور ہمارے بہادر جوان اپنی جانوں کا نذرانہ پیش کرکے وطن عزیز کی حفاظت کا فریضہ انجام دے رہے ہیں۔ انہوں نے کہا کہ شہداء کی عظیم قربانیاں قوم کے لیے مشعلِ راہ ہیں اور ان کا لہو کبھی رائیگاں نہیں جائے گا۔
وطن عزیز کی حفاظت اور سلامتی کیلئے اپنی جانوں کے نذرانے پیش کرنے والے ہمارے قومی ہیرو اور ملک و قوم کے محسن ہیں۔ پوری قوم اپنے شہداء اور ان کے اہل خانہ کو قدر و منزلت کی نگاہ سے دیکھتی ہے اور ان کی قربانیوں کو ہمیشہ یاد رکھا جائے گا۔
انہوں نے کہا کہ کیپٹن حافظ رانا ضیاء اللہ شہید نے فرض کی ادائیگی کے دوران اپنی جان قربان کرکے بہادری، حب الوطنی اور عزم و حوصلے کی لازوال مثال قائم کی۔ شہداء نے اپنے خون سے وطن کی حفاظت کی تاریخ رقم کی ہے اور قوم ان عظیم سپوتوں کی قربانیوں کو کبھی فراموش نہیں کرے گی۔
انہوں نے مزید کہا کہ پاکستان کی آزادی، خودمختاری اور سلامتی کیلئے پاک فوج کے افسران و جوانوں کی قربانیاں ناقابلِ فراموش ہیں۔ پوری قوم اپنی بہادر افواج کے شانہ بشانہ کھڑی ہے اور ملکی دفاع کیلئے جانوں کا نذرانہ پیش کرنے والے شہداء کو سلام پیش کرتی ہے۔
اس موقع پر وزیر مملکت برائے منصوبہ بندی چودھری ارمغان سبحانی، چیئرمین پلرا چودھری طارق سبحانی اور سیکرٹری جنرل مسلم لیگ (ن) شجاعت علی پاشا نے بھی شہید کیپٹن حافظ رانا ضیاء اللہ کی قربانی کو خراجِ عقیدت پیش کرتے ہوئے کہا کہ شہداء کے اہل خانہ ہمارا قیمتی قومی اثاثہ ہیں۔ ان کے دکھ اور غم میں پوری قوم برابر کی شریک ہے۔
شہداء نے اپنے آج کو قوم کے مستقبل کیلئے قربان کیا، ان کی قربانیاں ملک کی آنے والی نسلوں کیلئے عزم، حوصلے اور حب الوطنی کا پیغام ہیں۔
آخر میں شہید کیپٹن حافظ رانا ضیاء اللہ کے درجات کی بلندی، مغفرت، وطن عزیز کی سلامتی اور لواحقین کیلئے صبر و استقامت کی دعا کی گئی۔