اس سے قبل فیلڈ مارشل سید عاصم منیر، وزیرداخلہ محسن نقوی اور عمانی وزیر خارجہ بھی تہران کا دورہ کر چکے ہیں
تہران / دوحہ: ایرانی میڈیا آؤٹ لیٹ ’ایران نوینز‘ کی ایک رپورٹ کے مطابق، قطر کے وزیراعظم اور وزیر خارجہ شیخ محمد بن عبدالرحمن الثانی کا جمعرات کے روز تہران کا دورہ متوقع ہے۔ یہ دورہ ایسے وقت میں سامنے آیا ہے جب خطے میں کشیدہ صورتحال کے پیش نظر تہران، دوحہ اور دیگر علاقائی ممالک کے درمیان سفارتی رابطوں میں غیر معمولی تیزی آ چکی ہے۔
رپورٹس کے مطابق قطری وزیراعظم کے اس ممکنہ دورے کا بنیادی مقصد خطے کی تازہ ترین صورتحال، سکیورٹی امور اور دوطرفہ تعلقات پر سفارتی مشاورت کو آگے بڑھانا ہے۔ اپنے اس دورے سے قبل شیخ محمد بن عبدالرحمن الثانی نے حالیہ دنوں میں ایران اور عمان کے وزرائے خارجہ سے ٹیلیفونک رابطے بھی کیے تھے جن میں خطے کی بدلتی ہوئی صورتحال پر تبادلہ خیال کیا گیا تھا۔
اگر یہ دورہ عملی طور پر طے پا جاتا ہے تو شیخ محمد بن عبدالرحمن الثانی حالیہ دنوں میں تہران کا دورہ کرنے والے تیسرے ایسے اعلیٰ ترین غیر ملکی عہدیدار ہوں گے جو خطے میں جاری کشیدگی کے تناظر میں ثالثی یا سفارتی کردار ادا کر رہے ہیں۔ اس سے قبل پاکستان کے آرمی چیف اور عمان کے وزیر خارجہ بھی دارالحکومت تہران کا دورہ کر کے اہم ملاقاتیں کر چکے ہیں۔
قطر نے گزشتہ چند برسوں کے دوران خطے کے مختلف تنازعات اور فریقین کے درمیان مذاکرات میں ہمیشہ ایک کلیدی اور فعال ثالث کا کردار ادا کیا ہے، اور تہران کا یہ متوقع دورہ بھی اسی سلسلے کی ایک اہم کڑی کے طور پر دیکھا جا رہا ہے۔