NCCIA کی کارروائی،غیر ملکی خواتین کو بلیک میل کرنیوالا درندہ گرفتار

لاہور / رحیم یار خان:نیشنل سائبر کرائم انویسٹی گیشن ایجنسی (NCCIA) لاہور نے ڈیجیٹل بلیک میلنگ اور خواتین کی عزتوں سے کھیلنے والے ایک مکروہ نیٹ ورک کے خلاف بڑی کارروائی کرتے ہوئے رحیم یار خان سے تعلق رکھنے والے ملزم محمد سلمان کو گرفتار کر لیا ہے۔ ملزم غیر ملکی خواتین کی ذاتی معلومات، نجی ڈیٹا اور جعلی یا قابلِ اعتراض تصاویر کی بنیاد پر انہیں بلیک میل کرنے اور ان سے بھاری رقوم بٹورنے کی گھناؤنی وارداتوں میں ملوث پایا گیا۔
این سی سی آئی اے حکام کے مطابق، ابتدائی تفتیش میں انکشاف ہوا ہے کہ گرفتار ملزم محمد سلمان نے ماضی میں بیرونِ ملک ملازمت کے دوران مختلف رہائشی گھروں میں کام کرنے یا رہنے کے دوران وہاں موجود خواتین کی ذاتی معلومات اور نجی ڈیٹا تک غیر قانونی رسائی حاصل کر لی تھی۔ پاکستان واپس آنے کے بعد اس نے اسی مواد کو ہتھیار بناتے ہوئے خواتین سے رابطے کیے اور انہیں سنگین دھمکیاں دینا شروع کر دیں۔
ملزم متاثرہ خواتین کو پیغامات بھیج کر ان سے خطیر رقوم کا مطالبہ کرتا تھا اور عدم ادائیگی کی صورت میں ان کی نجی اور قابلِ اعتراض تصاویر سوشل میڈیا پر وائرل کرنے یا ان کے اہل خانہ اور خاندانی رشتہ داروں کو بھیجنے کی دھمکیاں دیتا تھا۔
اطلاع ملنے پر ڈائریکٹر این سی سی آئی اے پنجاب محمد علی وسیم کی خصوصی ہدایات پر فوری ایکشن لیتے ہوئے ٹیم نے رحیم یار خان میں چھاپہ مار کر ملزم محمد سلمان کو دبوچ لیا۔ کارروائی کے دوران ملزم کے قبضے سے ایک موبائل فون اور سم کارڈ بھی تحویل میں لے لیا گیا، جس میں متعدد متاثرہ خواتین سے متعلق انتہائی حساس، نجی اور قابلِ اعتراض ڈیجیٹل مواد موجود پایا گیا۔
این سی سی آئی اے لاہور نے ملزم کے خلاف باضابطہ مقدمہ درج کر کے تفتیش کا دائرہ وسیع کر دیا ہے۔ برآمد شدہ موبائل فون اور دیگر ڈیجیٹل آلات کا فرانزک تجزیہ کیا جا رہا ہے تاکہ یہ معلوم کیا جا سکے کہ اس گھناؤنے فعل میں کتنی اور خواتین متاثر ہوئی ہیں اور آیا اس مکروہ دھندے میں کوئی اور بھی ملوث ہے۔
ڈائریکٹر این سی سی آئی اے پنجاب محمد علی وسیم نے واضح کیا ہے کہ خواتین کو سائبر اسپیس میں ہراساں کرنے، جعلی تصاویر کے ذریعے بلیک میل کرنے اور ان کی نجی زندگی میں مداخلت کرنے والے عناصر کسی رعایت کے مستحق نہیں ہیں، اور ایسے تمام عناصر کے خلاف بلاامتیاز کارروائیاں پوری سختی سے جاری رکھی جائیں گی۔