حکومت کو گھٹنے ٹیکنے پر مجبور کر دیں گے: جماعت اسلامی کا ملک گیر ہڑتال کا اعلان،

لاہور:جماعت اسلامی کے امیر حافظ نعیم الرحمن نے میڈیا سے گفتگو کرتے ہوئے حکومت کو سخت وارننگ دی ہے کہ اگر عوام کو ریلیف فراہم نہ کیا گیا تو ملک بھر میں دائرہ کار مزید وسیع کر دیا جائے گا۔ انہوں نے اعلان کیا کہ ستمبر کے پہلے ہفتے میں 13 ربیع الاول کے روز ملک گیر مکمل ہڑتال کی جائے گی، جبکہ عید میلاد النبی کی خوشیوں کے موقع پر احتجاجی کیمپوں میں سیرت النبی صلی اللہ علیہ وسلم کے پیغامات عام کرنے کے لیے خصوصی سیرت کانفرنسیں منعقد کی جائیں گی۔
حکمران طبقے کی عیاشیوں پر کڑی تنقید کرتے ہوئے حافظ نعیم الرحمن نے انکشاف کیا کہ ملک کے غریب عوام نااہل ٹولے کا بوجھ اٹھانے پر مجبور ہیں۔ انہوں نے طنز کرتے ہوئے کہا کہ ایک طرف عوام مہنگائی کے چکی میں پس رہے ہیں جبکہ دوسری جانب حکمرانوں کی شاہ خرچیاں کم ہونے کا نام نہیں لے رہی ہیں۔ انہوں نے مثال دیتے ہوئے کہا کہ وزیر اعلیٰ پنجاب مریم نواز نے 11 ارب روپے کا جہاز خرید لیا ہے اور چیئرمین سینٹ نے کروڑوں روپے کی گاڑی لے رکھی ہے، جو اس بات کا ثبوت ہے کہ حکمران خود کو ملک کا بادشاہ اور عام عوام کو کیڑے مکوڑے سمجھتے ہیں۔
حکومتی پالیسیوں کو آڑے ہاتھوں لیتے ہوئے امیر جماعت اسلامی نے کہا کہ پہلے گندم درآمد کی گئی اور اب اس کی ایکسپورٹ کی اجازت دے دی گئی ہے، جس کے باعث ملک میں گندم اور آٹے کی قیمتوں میں مصنوعی اضافہ ہوا ہے۔ نگراں حکومت کے دور میں درآمد ہونے والی گندم کا حساب تک نہیں دیا جا رہا۔ اسی طرح پیٹرولیم مصنوعات کے حوالے سے بات کرتے ہوئے انہوں نے کہا کہ عالمی منڈی میں کمی کے باوجود عوام کو ریلیف نہیں دیا گیا، لوکل ریفائن ہونے والے تیل کی قیمت بھی باہر کے مہنگے تیل کے حساب سے وصول کی جا رہی ہے، جبکہ پٹرولیم لیوی کا کوئی قانونی جواز نہیں بنتا لیکن اس کے باوجود عوام کی جیبیں کاٹی جا رہی ہیں۔ انہوں نے کہا کہ بائیک چلانے والے عام آدمی کو سب سے زیادہ ٹیکس دینا پڑ رہا ہے۔
صرف معیشت ہی نہیں بلکہ بین الاقوامی اور علاقائی امور پر گفتگو کرتے ہوئے حافظ نعیم الرحمن نے کہا کہ اسرائیل کی جانب سے فلسطین، غزہ اور اب شام پر بھی حملے جاری ہیں، جو صیہونی درندگی کا منہ بولتا ثبوت ہیں۔ انہوں نے خوش آئند قرار دیا کہ ترکیہ، سعودی عرب اور پاکستان کے درمیان ایک دفاعی و اسٹریٹجک معاہدہ ہوا ہے، لیکن اس الائنس کو اب عملًا مکہ مکرمہ اور بیت المقدس کی حفاظت کے لیے استعمال کرنا ہوگا۔ انہوں نے زور دیا کہ پاکستان کو اس اتحاد میں اپنا قائدانہ کردار ادا کرنا ہوگا، کیونکہ اگر ہماری ٹیکنالوجی مظلوم مسلمانوں کے کام نہیں آ سکتی تو اس کا کوئی فائدہ نہیں۔
ملکی داخلی سلامتی کا ذکر کرتے ہوئے انہوں نے کہا کہ خیبر پختونخوا اور بلوچستان میں دہشتگردی کے واقعات لمحہ فکریہ ہیں، ایسے حساس وقت میں پوری قوم کو یکجا کرنے کی ضرورت ہے نہ کہ تقسیم پیدا کرنے کی۔ کشمیر میں جاری دھرنے کا ذکر کرتے ہوئے انہوں نے دہرایا کہ پرامن بات چیت ہی مسائل کا واحد حل ہے۔
حافظ نعیم الرحمن نے واضح کیا کہ ان کا کوئی ذاتی ایجنڈا نہیں ہے بلکہ وہ صرف عوام کے حقوق اور سستے نظام کے لیے سڑکوں پر نکلے ہیں۔ انہوں نے کہا کہ دھرنوں اور احتجاجی کیمپوں میں عوام کا جم غفیر اس بات کا غماز ہے کہ عوام اب مزید ظلم برداشت کرنے کو تیار نہیں۔ آج رات وہ اگلے حتمی لائحہ عمل کا باضابطہ اعلان کریں گے، اور حکومت کو عوام کو ریلیف دینے تک چین سے نہیں بیٹھنے دیں گے۔