ڈونلڈ ٹرمپ پر تنقید ، امریکی ایئر فورس کے میجر جیسن دوبارہ گرفتار، امریکی فوجی حلقوں میں بحث

واشنگٹن:امریکی صدر ڈونلڈ ٹرمپ کے خلاف کھل کر تنقید کرنے اور ان پر کڑی تنقید کے ایک دن بعد، امریکی فضائیہ کے میجر جیسن واٹسن کو دوبارہ گرفتار کر لیا گیا ہے۔
میڈیا رپورٹس کے مطابق، میجر جیسن واٹسن نے حال ہی میں CNN کو دیے گئے ایک خصوصی انٹرویو میں صدر ٹرمپ کی پالیسیوں اور ان کے طرزِ حکمرانی کو شدید تنقید کا نشانہ بنایا تھا۔ انٹرویو کے دوران انہوں نے دعویٰ کیا تھا کہ صدر آئین کی خلاف ورزی کر رہے ہیں اور ملک کو شدید بحران کی طرف دھکیل رہے ہیں۔
اس سے قبل جولائی میں بھی میجر واٹسن کو دارالحکومت واشنگٹن میں کیپٹل ہل کے باہر اس وقت گرفتار کیا گیا تھا جب انہوں نے ایک پریس کانفرنس کے دوران صدر اور نائب صدر کے خلاف مواخذے (Impeachment) کا مطالبہ کیا تھا۔
فضائیہ کے ترجمان نے اپنے ایک بیان میں تصدیق کی ہے کہ عسکری ضابطہ اخلاق کی خلاف ورزی اور مس کنڈکٹ کے الزامات کے تحت میجر جیسن کو میری لینڈ کی ایک جیل میں Pretrial Confinement (قبل از ٹرائل حراست) میں رکھا گیا ہے۔
اس پیش رفت کے بعد امریکی فوجی حلقوں میں ایک بار پھر سروس ممبرز کے سیاسی بیانات اور اظہارِ رائے کی آزادی کے حوالے سے بحث شروع ہو گئی ہے۔