خوشاب (راجہ نورالہی عاطف سے)
ریجنل پولیس آفیسر سرگودھا ریجن سرگودھا محمد شہزاد آصف خان نے ضلع خوشاب کا خصوصی دورہ کیا۔ دورۂ خوشاب کے دوران آر پی او سرگودھا نے ڈی پی او آفس جوہرآباد میں کھلی کچہری کا انعقاد کیا، جہاں انہوں نے شہریوں کے مسائل سنے اور ان کے فوری ازالے کے لیے متعلقہ افسران کو موقع پر یی ضروری ہدایات جاری کیں۔
اس موقع پر ڈی پی او خوشاب ڈاکٹر عمارہ شیرازی سمیت ضلع خوشاب کے تمام ایس ڈی پی اوز، ڈی ایس پی لیگل خوشاب، ڈی ایس پی ہیڈکوارٹرز خوشاب اور ڈی ایس پی انویسٹی گیشن خوشاب نے شرکت کی۔ بعدازاں آر پی او سرگودھا محمد شہزاد آصف خان نے ایس ڈی پی اوز کے ساتھ کرائم میٹنگ کی، جس میں ضلع بھر میں جرائم کی مجموعی صورتحال، زیرِ تفتیش مقدمات اور پولیس کی کارکردگی کا تفصیلی جائزہ لیا گیا۔ آر پی او سرگودھا نے افسران سے کرائم کے حوالے سے بریفنگ لی اور جرائم کی روک تھام، مقدمات کی میرٹ پر تفتیش اور شہریوں کو فوری انصاف کی فراہمی کے لیے ضروری ہدایات جاری کیں۔
آر پی او سرگودھا نے افسران کو ہدایت کی کہ جرائم پیشہ عناصر کے خلاف بلاامتیاز کارروائیاں مزید مؤثر بنائی جائیں، عوامی شکایات کا بروقت ازالہ یقینی بنایا جائے اور پولیس افسران شہریوں کے ساتھ خوش اخلاقی اور ذمہ داری کے ساتھ پیش آئیں۔