لاہور: وزیراعلیٰ پنجاب مریم نواز شریف کی زیر صدارت صوبے بھر میں پینے کے صاف پانی کی فراہمی کے منصوبوں کا جائزہ لینے کے لیے مسلسل پانچواں اہم اجلاس منعقد ہوا۔ اجلاس میں متعلقہ صوبائی حکام اور مختلف اضلاع کے ڈپٹی کمشنرز نے ویڈیو لنک کے ذریعے شرکت کی۔
اجلاس کے دوران چکوال، راولپنڈی، راجن پور، فیصل آباد، مری اور اٹک کے اضلاع میں جاری واٹر سپلائی پائپ لائنز کے منصوبوں پر تفصیلی بریفنگ دی گئی۔ وزیراعلیٰ مریم نواز شریف نے آبادی کے تناسب سے پانی کی حقیقی ضرورت کا مستند ڈیٹا مرتب اور اس کی مکمل تصدیق کرنے کی سخت ہدایت جاری کی۔
مختلف اضلاع کے لیے فوری احکامات اور پراجیکٹس:
راجن پور: پانی کی قلت کے پیشِ نظر وزیراعلیٰ نے فوری طور پر 21 واٹر باؤزر مہیا کرنے کا حکم دیا، جبکہ راجن پور، جام پور، چک شگاری اور داجل میں واٹر سپلائی پائلٹ پراجیکٹ کی تجویز کا بھی جائزہ لیا گیا۔ اس کے علاوہ روجھان میں بیوٹیفکیشن اور دیگر ترقیاتی پراجیکٹس لانے کی بھی ہدایت کی گئی۔
مری: مری میں پینے کے پانی کی ہنگامی فراہمی کے لیے واٹر ٹینک مہیا کرنے کا حکم دیا گیا اور نئے واٹر سورسز پر فوری طور پر کام شروع کرنے کی ہدایت کی گئی۔
چکوال: بریفنگ کے دوران بتایا گیا کہ ضلع میں 32 واٹر فلٹریشن پلانٹس کام کر رہے ہیں جبکہ 237 زیر تعمیر ہیں، اس کے علاوہ پانی کی قلت کے شکار 8 دیہات میں ترجیحی بنیادوں پر واٹر سپلائی پر اتفاق کیا گیا۔
راولپنڈی و اٹک: راولپنڈی میں 246 پلانٹس موجود جبکہ 252 نئے پلانٹس لگائے جائیں گے۔ اٹک میں 77 فلٹریشن پلانٹس موجود ہیں اور 399 زیر تکمیل ہیں۔
فیصل آباد: فیصل آباد میں 343 پلانٹس موجود ہیں، 180 زیر تکمیل ہیں جبکہ چک جھمرہ اور مضافاتی علاقوں میں صاف پانی کے پائلٹ پراجیکٹ پر اتفاق کیا گیا۔
عوام کو پینے کا صاف پانی پہنچا کر دم لیں گے، مریم نواز شریف
اجلاس سے خطاب کرتے ہوئے وزیراعلیٰ مریم نواز شریف نے عزم ظاہر کیا کہ عوام کو پینے کا صاف پانی فراہم کرنے کا حکومتی عزم غیر متزلزل ہے۔ انہوں نے کہا کہ پنجاب کے جس بھی علاقے میں لوگ دور دراز سے پانی کندھوں پر اٹھا کر لانے پر مجبور ہیں، وہ حکومت کی اولین ترجیحات میں شامل ہیں۔ انہوں نے واضح کیا کہ پورے پنجاب کے عوام کو گھر گھر صاف پانی پہنچانا ان کا فرض ہے اور وہ اس مشن کو ہر صورت پایہ تکمیل تک پہنچائیں گی