مون سون کا چھٹا سپیل: پنجاب اور خیبرپختونخوا میں بارشوں اور اربن فلڈنگ کا الرٹ جاری

لاہور/پشاور: صوبائی ڈیزاسٹر مینجمنٹ اتھارٹیز (پی ڈی ایم اے) پنجاب اور خیبرپختونخوا نے مون سون بارشوں کے چھٹے نئے سلسلے کے پیشِ نظر ہائی الرٹ جاری کر دیا ہے۔ متعلقہ اداروں اور شہریوں کو خبردار کیا گیا ہے کہ وہ خراب موسمی صورتحال اور ممکنہ طوفانی بارشوں کے دوران احتیاطی تدابیر اختیار کریں، جبکہ خستہ حال اور کچے مکانات میں رہنے والے افراد کو فوری طور پر محفوظ مقامات پر منتقل ہونے کی ہدایت کی گئی ہے۔
پی ڈی ایم اے پنجاب کے اعلامیے کے مطابق 16 اگست کی رات سے شروع ہونے والا بارشوں کا یہ سلسلہ 21 اگست تک جاری رہے گا۔ ڈائریکٹر جنرل پی ڈی ایم اے سیف انور جپہ نے بتایا ہے کہ 17 سے 20 اگست کے دوران لاہور، راولپنڈی، گوجرانوالہ، گجرات اور سیالکوٹ کے نشیبی علاقوں میں شدید بارشوں کے باعث اربن فلڈنگ اور برساتی نالوں میں طغیانی (فلیش فلڈنگ) کا خطرہ موجود ہے۔ اس کے علاوہ مری اور گلیات کے پہاڑی علاقوں میں لینڈ سلائیڈنگ کے امکانات بھی ظاہر کیے گئے ہیں۔
بارشوں کے اس سپیل کے دوران راولپنڈی، مری، گلیات، جہلم، چکوال، اٹک، سیالکوٹ، نارووال، گوجرانوالہ، لاہور، فیصل آباد، سرگودھا، میانوالی، خوشاب، ساہیوال اور ڈیرہ غازی خان سمیت صوبے کے بیشتر اضلاع میں گرج چمک کے ساتھ بارش متوقع ہے۔
دوسری جانب پی ڈی ایم اے خیبرپختونخوا نے بھی صوبے بھر میں تیز ہواؤں اور مون سون بارشوں کے پیشِ نظر الرٹ جاری کر دیا ہے۔ چترال، دیر، سوات، شانگلہ، بونیر، ملاکنڈ، باجوڑ اور کوہستان کے ساتھ ساتھ پشاور، مردان، صوابی، چارسدہ، نوشہرہ اور کوہاٹ کے اضلاع میں بھی بارش کی پیشگوئی کی گئی ہے۔ انتظامیہ کے مطابق مردان اور صوابی کے نشیبی علاقوں میں اربن فلڈنگ جبکہ بالائی اضلاع کے پہاڑی مقامات پر لینڈ سلائیڈنگ کا خدشہ ہے۔
شہریوں کے لیے ہدایات:
پی ڈی ایم اے کی جانب سے شہریوں سے پرزور اپیل کی گئی ہے کہ وہ آندھی اور طوفان کے دوران غیر ضروری سفر سے گریز کریں اور کھلے آسمان تلے جانے یا بجلی کی گرج چمک کے وقت درختوں کے نیچے کھڑے ہونے سے اجتناب کریں۔ آسمانی بجلی کے خطرات سے بچنے کے لیے محفوظ اور پکی عمارتوں میں پناہ لیں تاکہ کسی بھی ناخوشگوار واقعے سے بچا جا سکے۔