نوابشاہ (نمائندہ بے نقاب نیوز، نفیس آرائیں)
کمشنر شہید بینظیرآباد ڈویژن شہمیر خان بھٹو کی زیرِ صدارت آٹے کی قیمتوں، گندم کی دستیابی اور ترسیل کے حوالے سے فلور مل مالکان کا اہم اجلاس ڈی سی آفس کے دربار ہال میں منعقد ہوا۔اجلاس میں ڈپٹی کمشنر شہید بینظیرآباد عبدالصمد نظامانی، متعلقہ ضلعی افسران اور تینوں اضلاع کے فلور مل مالکان نے شرکت کی، جبکہ سانگھڑ اور نوشہروفیروز کے افسران و فلور مل مالکان ویڈیو لنک کے ذریعے شریک ہوئے۔کمشنر شہمیر خان بھٹو نے ہدایت کی کہ حکومتِ سندھ کے مقرر کردہ نرخوں پر آٹے کی بلاتعطل فراہمی یقینی بنائی جائے۔ انہوں نے فلور مل مالکان کو مصنوعی قلت، ذخیرہ اندوزی اور ناجائز منافع خوری کی حوصلہ شکنی کے لیے انتظامیہ سے بھرپور تعاون کی ہدایت کرتے ہوئے کہا کہ غیرقانونی طور پر ذخیرہ کی گئی گندم مارکیٹ میں لائی جائے تاکہ عوام کو ریلیف فراہم کیا جاسکے۔کمشنر نے متعلقہ افسران کو آٹے اور گندم کی قیمتوں کی کڑی نگرانی اور نرخوں کی خلاف ورزی پر قانون کے مطابق کارروائی کی ہدایت کی۔ اجلاس میں فلور مل مالکان نے گندم کی فراہمی سے متعلق مسائل پیش کیے، جن کے حل کے لیے انتظامیہ نے ممکنہ تعاون کی یقین دہانی کرائی۔