سانگھڑ (رپورٹ: اشفاق سلہری)
ملک بھر کی طرح ضلع سانگھڑ میں بھی شہدائے کربلا کو خراجِ عقیدت پیش کرنے کے لیے چہلمِ حضرت امام حسینؓ اور دیگر شہدائے کربلا کے سلسلے میں ماتمی جلوس برآمد ہوئے۔ عزاداروں نے انتہائی عقیدت و احترام کے ساتھ جلوسوں میں شرکت کی اور شہدائے کربلا کی لازوال قربانیوں کو یاد کیا۔جھول سے سانگھڑ تک تقریباً 14 کلو میٹر طویل پیدل سفر میں خواتین، بچے، بزرگ اور نوجوان بڑی تعداد میں شریک ہوئے۔ جلوس کے شرکاء نے نوحہ خوانی، ماتم داری اور دعاؤں کے ذریعے اہلِ بیتؓ سے اپنی محبت و عقیدت کا اظہار کیا۔جلوسوں کے دوران سیکیورٹی کے سخت ترین انتظامات کیے گئے تھے۔ پولیس، رینجرز اور دیگر قانون نافذ کرنے والے اداروں کے اہلکار مختلف مقامات پر تعینات رہے جبکہ جلوس کے راستوں کی نگرانی بھی جاری رہی۔ انتظامیہ کی جانب سے عزاداروں کو ہر ممکن سہولت فراہم کرنے کے لیے خصوصی اقدامات کیے گئے۔شہریوں نے سیکیورٹی اور انتظامی اداروں کی جانب سے کیے گئے انتظامات کو سراہتے ہوئے کہا کہ امن و امان کی فضا میں مذہبی رسومات کی ادائیگی خوش آئند ہے۔ چہلم کے جلوس اپنے مقررہ راستوں سے گزرنے کے بعد پُرامن طور پر اختتام پذیر ہوئے۔