ملتان:ملتان میں بین الاقوامی فوڈ چین ‘سب وے’ کے ایک آؤٹ لیٹ پر پیش آنے والے ہولناک واقعے کی سی سی ٹی وی فوٹیج سوشل میڈیا پر وائرل ہونے کے بعد ملک بھر میں غم و غصے کی لہر دوڑ گئی ہے،
میڈیا رپورٹس کے مطابق سب وے کے ملازم فاضل آؤٹ لیٹ پر ڈیوٹی پر موجود تھے جب کچھ گاہک باہر سے خریدے گئے سموسے لے کر ریسٹورنٹ میں داخل ہوئے۔ سب وے کے ایس او پیز (معیاری ضابطہ کار) کے تحت ریسٹورنٹ کے اندر باہر کا کھانا لانے کی اجازت نہیں ہے۔ جب ملازم نے اس اصول کے تحت گاہکوں کو روکا تو تلخ کلامی بڑھ گئی اور معاملہ ہاتھ پائی تک جا پہنچا۔
متاثرہ ملازم فاضل کے بیان کے مطابق ایک شخص نے زبردستی ان کی گردن دبوچی اور انہیں گھسیٹ کر ریسٹورنٹ کے دوسرے حصے میں لے گئے، جہاں تین افراد نے مل کر تقریباً پانچ سے سات منٹ تک انہیں مسلسل گھونسے اور تھپڑ مارے، جس سے ان کے چہرے، کمر اور جسم کے دیگر حصوں پر شدید چوٹیں آئیں۔ یہ سارا خونی کھیل آؤٹ لیٹ پر لگے سی سی ٹی وی کیمروں میں محفوظ ہو گیا، جس کی فوٹیج وائرل ہونے کے بعد ملزمان کی فوری گرفتاری کا مطالبہ زور پکڑ گیا۔ مبینہ طور پر حملے میں ملوث افراد میں سے ایک کا تعلق ایک نجی بینک سے بتایا جا رہا ہے۔
واقعے کے بعد سب وے پاکستان کی انتظامیہ نے سخت ایکشن لیتے ہوئے متعلقہ اداروں سے باضابطہ رجوع کر لیا ہے اور ضروری قانونی کارروائی کا آغاز کر دیا ہے۔ اپنے سرکاری بیان میں کمپنی نے واقعے کی شدید مذمت کرتے ہوئے واضح کیا ہے کہ ملازمین کی سلامتی، عزت اور وقار ان کی اولین ترجیح ہے، اور احتساب کو یقینی بنانے کے لیے تمام قانونی تقاضے پورے کیے جائیں گے۔