سیالکوٹ۔سلیم احمد اعوان شیخو
ڈپٹی کمشنر سیالکوٹ اویس مشتاق کی ہدایات پر میونسپل کارپوریشن سیالکوٹ نے شہر بھر میں خطرناک اور بوسیدہ عمارتوں کے خلاف منظم آپریشن کا آغاز کر دیا ہے تاکہ انسانی جانوں کے تحفظ کو یقینی بنایا جا سکے، بالخصوص موسم برسات کے دوران کسی بھی ناخوشگوار واقعے سے بچا جا سکے۔چیف آفیسر میونسپل کارپوریشن سیالکوٹ زبیر وٹو نے بتایا کہ میونسپل کارپوریشن کے بلڈنگ اور انفورسمنٹ انسپکٹرز نے مختلف علاقوں میں کارروائیاں کرتے ہوئے اب تک 11 خطرناک اور خستہ حال عمارتوں کو سیل کر دیا ہے۔
انہوں نے بتایا کہ متعلقہ عمارتوں کے مالکان کو ہدایت کی گئی ہے کہ وہ ان عمارتوں کو مقررہ مدت کے اندر محفوظ طریقے سے مسمار کریں تاکہ شہریوں کی جان و مال کو لاحق خطرات کا خاتمہ کیا جا سکے۔ انہوں نے خبردار کیا کہ اگر مالکان مقررہ وقت میں کارروائی نہ کریں تو میونسپل کارپوریشن قانون کے مطابق خود ان عمارتوں کو مسمار کرے گی اور تمام اخراجات متعلقہ مالکان سے وصول کیے جائیں گے۔
چیف آفیسر نے بتایا کہ یہ کارروائی پنجاب لوکل گورنمنٹ ایکٹ 2025 کے تحت عمل میں لائی جا رہی ہے اور شہر میں موجود دیگر خطرناک عمارتوں کی نشاندہی اور قانونی کارروائی کا سلسلہ بھی جاری رہے گا۔