کیئو+ ماسکو :یوکرین کے صدر ولادیمیر زیلینسکی نے کہا ہے کہ روسی افواج نے گذشتہ رات یوکرین کے کئی خطوں پر ایک بڑے فضائی حملے شروع کیے، جس کے نتیجے میں بچوں سمیت کم از کم آٹھ افراد ہلاک، جب کہ درجنوں زخمی ہو گئے۔
سوشل میڈیا پلیٹ فارم ایکس پر ایک پوسٹ میں زیلینسکی نے کہا کہ "گذشتہ رات، دنیپرو ریجن کے راڈوشنے علاقے پر ایک روسی میزائل حملے میں ایک جوڑا اور تین بچے ہلاک ہو گئے۔ دو اور بچوں کو ملبے کے نیچے سے زندہ نکال لیا گیا ہے۔”
انہوں نے کہا کہ میزائل حملے نے ایک عام رہائشی عمارت کو تباہ کر دیا، جب کہ ایک اور رہائشی عمارت کو نشانہ بنائے جانے کے بعد لیویو میں ریسکیو آپریشن شروع کیا گیا۔
روسی فضائی حملوں میں جمعرات کو یوکرین میں کم از کم 13 افراد ہلاک ہوگئے جن میں دارالحکومت کیف کا ایک شہری بھی شامل ہے۔ حملوں کا دائرہ مغربی شہر لیوو تک پھیل گیا جس کے بعد پڑوسی ملک پولینڈ نے اپنی فضائی حدود کے تحفظ کے لیے لڑاکا طیارے فوری طور پر روانہ کردیے۔
یہ حملے ایسے وقت میں ہوئے ہیں جب صدر ولودیمیر زیلنسکی امریکا کے دورے سے واپس آئے ہیں جہاں انہوں نے کہا تھا کہ امریکی صدر ڈونلڈ ٹرمپ نے یوکرین کو پیٹریاٹ میزائلوں کے لیے لائسنس فراہم کرنے پر اتفاق کیا ہے۔
یوکرین کے بیشتر علاقوں میں فضائی حملوں کے انتباہی سائرن بجائے گئے جبکہ رائٹرز کے ایک نمائندے کے مطابق دارالحکومت کیف میں دھماکوں کی آوازیں سنی گئیں۔
میئر وٹالی کلِچکو نے ٹیلی گرام پیغام رسانی ایپ پر بتایا کہ چند غیر رہائشی مقامات پر آگ لگ گئی۔
ہنگامی خدمات کے مطابق دارالحکومت میں ایک شخص ہلاک اور دو دیگر زخمی ہوئے جبکہ دنیپروپیٹرووسک اور پولتاوا کے علاقوں میں مزید چھ افراد جن میں دو بچے بھی شامل ہیں مارے گئے۔
زیلینسکی نے کہا کہ کیف اور اس کے آس پاس کا علاقہ، دنیپرو، لیویو، پولٹاوا، خارکیف، مائیکولائیو، سومی، وینیتسیا، چرکاسی اور ایوانو-فرینکیوسک رات کو ہوئے حملے کی زد میں آئے۔
انہوں نے کہا کہ "اس حملے میں 70 سے زائد میزائل استعمال کیے گئے، جن میں سے ایک بڑی تعداد بیلسٹک میزائلوں کی تھی۔ اس کے علاوہ 280 سے زائد حملہ آور ڈرونز بھی شامل تھے، جن میں سے 260 سے زیادہ ڈرونز کو فضا میں ہی تباہ (انٹرسیپٹ) کر دیا گیا۔”
انہوں نے مزید کہا کہ یوکرینی جنگی ہوا بازی (کامبیٹ ایویشن) نے بڑی تعداد میں کروز میزائلوں کو مار گرانے میں کامیابی حاصل کی جب کہ موبائل فائر ٹیمیں بھی کروز میزائلوں کو روکنے (انٹرسیپٹ کرنے) میں کامیاب رہیں۔
دوسری جانب، سپوتنک کے مطابق، روس کی وزارتِ دفاع نے کہا کہ روسی افواج نے یوکرینی فوجی انفراسٹرکچر کے خلاف حملوں کی ایک وسیع لہر شروع کی ہے، جس میں ہوائی اڈے، دفاعی صنعت کی تنصیبات، لاجسٹک مراکز، اور کمانڈ و سپلائی کی سہولیات شامل ہیں۔
روسی وزارتِ دفاع نے کہا کہ ان حملوں میں زمین، سمندر اور ہوا سے داغے جانے والے طویل فاصلے تک مار کرنے والے درست نشانہ بنانے والے (پریسجن گائیڈڈ) ہتھیاروں کے ساتھ ساتھ حملہ آور ڈرونز بھی استعمال کیے گئے۔
اسپوتنک کے مطابق، ان حملوں میں یوکرین کے سات خطوں کے مختلف علاقوں کو نشانہ بنایا گیا، جن میں کیف، لیویو، ایوانو-فرینکیوسک، ژیتومیر، رونو، وینیتسیا اور دِنیپروپیترووسک شامل ہیں۔ مبینہ طور پر نشانہ بنائے جانے والے ٹھکانوں میں فضائی اڈے، ہتھیاروں کی پیداواری تنصیبات، ٹیلی کمیونیکیشن کا انفراسٹرکچر، اور میزائل و ڈرون کی تیاری، ذخیرہ اندوزی اور نقل و حمل میں شامل لاجسٹک مراکز کے ساتھ ساتھ یوکرین کا فضائی نگرانی کا نیٹ ورک (ایئر سرویلنس نیٹ ورک) بھی شامل تھا۔
اسپوتنک نے یہ رپورٹ بھی دی کہ ان حملوں میں تین بحری جہازوں کو بھی نشانہ بنایا گیا، جن میں سے ایک بحیرہ اسود کی یوژنی بندرگاہ پر اور دو اوڈیسا کے مشرقی اور جنوبی ساحلوں کے قریب تھے، ان جہازوں پر مبینہ طور پر ہتھیار اور فوجی سامان لدا ہوا تھا۔