طلباء پر لاٹھی چارج کے خلاف یوتھ کانگریس کا شدید احتجاج، وزیر داخلہ امت شاہ کے استعفیٰ کا مطالبہ

نئی دہلی: جنتر منتر پر نیٹ پیپر لیک کے خلاف احتجاج کے دوران طلباء پر لاٹھی چارج کے خلاف انڈین یوتھ کانگریس نے رائسینا روڈ پر وزیر داخلہ امت شاہ کے خلاف احتجاج کیا۔ یوتھ کانگریس کے قومی صدر ادے بھانو چِب کی قیادت میں کارکنان نے مرکزی وزیر داخلہ امت شاہ کے استعفیٰ کا مطالبہ کرتے ہوئے یوتھ کانگریس کے دفتر سے جنتر منتر تک مارچ کیا۔ اس دوران یوتھ کانگریس کے کارکنان نے ’امت شاہ استعفیٰ دو، امت شاہ کو جانا ہوگا‘ جیسے نعرے لگائے۔

احتجاج کے دوران ادے بھانو چِب نے کہا کہ امت شاہ کے کہنے پر دہلی پولیس نےنیٹ پیپر لیک ہونے پر طلباء پر بے دردی سے لاٹھی چارج کیا۔ انہیں پیلٹ گن سے گولی ماری گئی جس کے نتیجے میں کئی طلباء زخمی ہوئے جو کئی دنوں سے اسپتال میں داخل تھے۔ دریں اثنا، بہار میں اے کے-47 سے بھی فائرنگ کی گئی، جو تصویروں میں قید ہے۔ اس لیے ہم مرکزی وزیر امت شاہ کے فوری استعفیٰ کا مطالبہ کرتے ہیں۔ انہوں نے کہا کہ جس طرح وزیر تعلیم دھرمیندر پردھان کو پیپر لیک کے لیے ذمہ دار ٹھہرایا گیا اور ان کا استعفیٰ قبول کر لیا گیا، اسی طرح وزیر داخلہ امت شاہ کو بھی لاٹھی چارج کے لیے استعفیٰ دینا چاہیے۔