اسلام آباد: انسداد دہشت گردی عدالت میں پاک فضائیہ کے افسر گروپ کیپٹن شہید عاصم طارق کے قتل کیس کی سماعت کے دوران گواہوں نے ملزم کی باقاعدہ شناخت کر لی ہے۔ عدالت نے پولیس کی استدعا منظور کرتے ہوئے ملزم کا 7 دن کا جسمانی ریمانڈ منظور کر لیا ہے۔
جج ابوالحسنات محمد ذوالقرنین کی ملزم سے سخت مکالمہ
سماعت کے دوران انسداد دہشت گردی عدالت کے جج ابوالحسنات محمد ذوالقرنین نے ملزم سے مکالمہ کرتے ہوئے سخت الفاظ میں سرزنش کی۔ ملزم کو روتا دیکھ کر جج صاحب نے ریمارکس دیے کہ "اب رونے کا کیا فائدہ ہے؟ تم نے ملک کا کتنا بڑا نقصان کیا ہے، ایک معصوم گھر تباہ کر دیا ہے۔”
جج ابوالحسنات محمد ذوالقرنین نے مزید کہا کہ "آپ کو اندازہ ہی نہیں ہے کہ آپ نے ملک کا کتنا بڑا اثاثہ تباہ کیا ہے، اب آپ کے رونے سے کیا وہ واپس آجائے گا؟” عدالت نے مزید تفتیش کے لیے ملزم کو پولیس کے حوالے کر دیا ہے۔