بہاولنگر (عزیز اللّٰہ ساقی)
بہاولنگر: ایس پی پیٹرولنگ پولیس جاوید اختر جتوئی اور ڈی ایس پی پیٹرولنگ سرفراز حسین تارڑ کی خصوصی ہدایات پر پیٹرولنگ پولیس گیجانی کی اور پیر سکندر چیک پوسٹ کی جانب سے ٹریفک قوانین کی خلاف ورزی کرنے والوں کے خلاف بلا امتیاز کارروائیوں کا سلسلہ بھرپور انداز میں جاری ہے۔اس سلسلے میں PHP گیجانی کے انچارج محمد یوسف سب انسپکٹر نے اسسٹنٹ سب انسپکٹر رانا مجاہد کے ہمراہ مختلف شاہراہوں پر ناکہ بندیاں کر کے گاڑیوں کی سخت چیکنگ کی۔ دورانِ چیکنگ ٹریفک قوانین کی خلاف ورزی کرنے والے ڈرائیوروں کے خلاف قانونی کارروائی عمل میں لائی گئی، جبکہ مشکوک گاڑیوں اور افراد کی بھی مکمل جانچ پڑتال کی گئی۔اس موقع پر شہریوں کو ہدایت کی گئی کہ دورانِ سفر ٹریفک قوانین کی پابندی کریں، گاڑیوں کے ضروری کاغذات ہمراہ رکھیں، رفتار کی مقررہ حد پر عمل کریں اور حفاظتی اقدامات کو یقینی بنائیں تاکہ ٹریفک حادثات کی روک تھام کے ساتھ ساتھ عوام کے جان و مال کا تحفظ بھی یقینی بنایا جا سکے۔پیٹرولنگ پولیس کے مطابق ٹریفک قوانین پر عملدرآمد کو یقینی بنانے، شاہراہوں پر محفوظ سفر کی فراہمی اور قانون کی بالادستی برقرار رکھنے کے لیے ایسی کارروائیاں آئندہ بھی بلا امتیاز جاری رہیں گی۔