فیفا عالمی کپ 2026: سیمی فائنل میں فرانس کی شکست کے بعد شورش والا ماحول، راجدھانی پیرس میں فساد برپا، کئی افراد زخمی

    فرانس کو اپنے کپتان ایمباپے سے جادوئی کارکردگی کی امید تھی، لیکن وہ میچ میں کچھ خاص نہیں کر سکے۔ ایمباپے کے خلاف اسپین کی حکمت عملی بہت مضبوط تھی۔

    فرانس نے ’فیفا عالمی کپ 2026‘ جیتنے کا جو خواب دیکھا تھا، وہ شرمندۂ تعبیر نہیں ہو پایا۔ سیمی فائنل مقابلہ میں فرانس کو اسپین کے ہاتھوں 2-0 سے شکست کا سامنا کرنا پڑا۔ اس شکست کے بعد فرانس کی راجدھانی پیرس میں فساد برپا ہو گیا ہے۔ ہنگامہ آرائی اور اشتعال کی ویڈیوز تیزی کے ساتھ سوشل میڈیا پلیٹ فارمز پر وائرل ہو رہی ہیں۔

    قابل ذکر ہے کہ اسپین نے مکیل اویرجبل اور پیڈرو پورو کے گولوں کی مدد سے فرانس کو 2-0 سے پٹخنی دے کر دوسری بار فیفا عالمی کپ کے فائنل میں داخلہ حاصل کیا ہے۔ مکیل نے 22ویں منٹ میں پنالٹی پر گول داغا، جبکہ پورو نے 58ویں منٹ میں گول کر اسپین کی سبقت دوگنی کر دی۔ فرانس کو اپنے کپتا ایمباپے سے جادوئی کارکردگی کی امید تھی، لیکن وہ میچ میں کچھ خاص نہیں کر سکے۔ ایمباپے کے خلاف اسپین کی حکمت عملی بہت مضبوط تھی۔ فرانس کے اسٹرائیکر کو گول کرنے کا موقع ہی نہیں ملا۔ اس طرح فرانس کی ٹیم لگاتار تیسری بار فیفا عالمی کپ فائنل میں پہنچنے سے محروم رہ گئی۔

    فرانس کی یہ شکست فرانسیسی فٹبال شیدائیوں کو ہضم نہیں ہوئی۔ ارلنگٹن میں جیسے ہی میچ ختم ہونے کی حتمی سیٹی بجی، فرانس کی راجدھانی پیرس میں فساد جیسا ماحول پیدا ہو گیا۔ کئی علاقوں سے آگ زنی اور توڑ پھوڑ کی خبریں موصول ہونے لگیں۔ اس کی ویڈیوز بھی سوشل میڈیا پر اپلوڈ کی جانے لگیں، جن میں لوگوں کو شورش پسندی کرتے ہوئے بھی دیکھا گیا۔

    بہرحال، فرانس کے کپتان کیلیان ایمباپے نے اسپین سے ملی شکست کی ذمہ داری قبول کی ہے اور اپنے ملکی باشندوں سے معافی بھی مانگی ہے۔ اب فرانس کی ٹیم تیسرے مقام کے لیے 18 جولائی کو میدان پر اترنے کی تیاری کر رہی ہے۔ فرانس کا مقابلہ دوسرے سیمی فائنل میں شکست کھانے والی ٹیم سے ہوگا۔ دوسرا سیمی فائنل ارجنٹائنا اور انگلینڈ کے درمیان کھیلا جائے گا۔ فرانس کی کوشش تیسرا مقام حاصل کرتے ہوئے اپنا وقار قائم رکھنے کی ہوگی۔

    Related Posts