(سکھر ڈویزنل بیوروچیف نصیر احمد لاشاری سے)
سکھر: میئر و چیف وارڈن سول ڈیفنس سکھر بیریسٹر ارسلان اسلام شیخ اور ڈپٹی کمشنر و کنٹرولر سول ڈیفنس سکھر نادر شھزاد خان کے محفوظ اور مضبوط سکھر کے تحت سول ڈیفنس سکھر اور میونسپل کارپوریشن سکھر کے باہمی تعاون سے فائیر بریگیڈ سکھر میں وارڈنز کے لیے مشترکہ فائیر سیفٹی ورکشاپ کا انعقاد کیا گیا، جس کا مقصد وارڈنز کی پیشہ ورانہ صلاحیتوں میں اضافہ اور ہنگامی حالات سے مؤثر انداز میں نمٹنے کے لیے عملی تربیت فراہم کرنا تھا۔ورکشاپ میں سول ڈیفنس سکھر کے ڈپٹی چیف وارڈن ڈاکٹر سعید اعوان اور فائیر بریگیڈ اسٹیشن سکھر کے فائیر چیف آفیسر وقار نواب،ڈپٹی چیف وارڈن سول ڈیفنس گھوٹکی مھتاب گل نے آگ سے بچاؤ، ابتدائی امداد، ہنگامی صورتحال میں بروقت ردِعمل اور فائیر فائٹنگ آلات کے مؤثر استعمال پر تفصیلی لیکچرز دیے۔ شرکاء کو عملی مشقوں کے ذریعے آگ بجھانے کے جدید طریقوں سے بھی آگاہ کیا گیا، جس سے انہیں عملی طور پر سیکھنے کا بہترین موقع ملا۔اس موقع پر خطاب کرتے ہوئے سول ڈیفنس سکھر کے ڈپٹی چیف وارڈن ڈاکٹر سعید اعوان نے کہا کہ "سول ڈیفنس کے وارڈنز کی تربیت کے دوران انہیں صرف ہنر ہی نہیں بلکہ انسانیت، امانت داری، نظم و ضبط اور خدمتِ خلق کا جذبہ بھی سکھایا جاتا ہے تاکہ وہ ہر مشکل گھڑی میں عوام کی جان و مال کے تحفظ کے لیے اپنی ذمہ داریاں بہترین انداز میں ادا کر سکیں۔”انہوں نے مزید کہا کہ اس نوعیت کی تربیتی سرگرمیاں ایک محفوظ، باصلاحیت اور ذمہ دار معاشرے کی تشکیل میں اہم کردار ادا کرتی ہیں اور سول ڈیفنس سکھر مستقبل میں بھی مختلف اداروں کے تعاون سے ایسے تربیتی پروگراموں کا سلسلہ جاری رکھے گا۔ورکشاپ میں انسٹرکٹر شفیق احمد سومرو،گروپ وارڈن محمد احمد شیخ، انچارج آفیسر فائیر سیفٹی لالا ریحان پٹھان، محمد آصف شیخ، لالا عمران میرانی،محمد یوسف، ریاض احمد صدیقی، شہاب حسین، فیاض احمد سمیت سول ڈیفنس اور فائیر بریگیڈ کے متعدد وارڈنز نے شرکت کی۔