سموگ فری پنجاب: امریکی وفد کا ای پی اے لاہور کا دورہ، مریم نواز کے ماحولیاتی اقدامات کی تعریف

لاہور:امریکی قونصلیٹ جنرل کے وفد نے ماحولیاتی تحفظ ایجنسی (EPA) پنجاب کے ہیڈکوارٹر کا دورہ کیا، جہاں سینئر صوبائی وزیر مریم اورنگزیب نے وفد کا استقبال کیا۔ دورے کا مقصد پنجاب میں ماحولیاتی بہتری، فضائی آلودگی کے خاتمے اور کلائمیٹ چینج سے نمٹنے کے لیے حکومتی اقدامات کا جائزہ لینا تھا۔
سینئر وزیر مریم اورنگزیب نے وفد کو ای پی اے کے جدید مانیٹرنگ سسٹم اور کارکردگی پر تفصیلی بریفنگ دی۔ مریم اورنگزیب نے کہا کہ نومبر 2024 میں لاہور دنیا کا آلودہ ترین شہر تھا، تاہم وزیراعلیٰ مریم نواز کی قیادت میں کیے گئے سخت فیصلوں کے نتیجے میں اب صورتحال بہت بہتر ہو چکی ہے۔ انہوں نے بتایا کہ وزیراعلیٰ کی خصوصی ہدایت پر ای پی اے کو نہ صرف اختیارات دیے گئے بلکہ جدید ترین وسائل سے بھی لیس کیا گیا ہے۔
مریم اورنگزیب نے زرعی شعبے میں سموگ کے خاتمے کے لیے اقدامات پر روشنی ڈالتے ہوئے بتایا کہ حکومت نے فصلوں کی باقیات جلانے سے روکنے کے لیے ‘سپر سیڈرز’ کے استعمال کو لازمی قرار دیا ہے۔ انہوں نے انکشاف کیا کہ مریم نواز کی حکومت سے قبل پنجاب میں صرف 250 سپر سیڈرز موجود تھے، جن کی تعداد آج بڑھ کر 7,500 ہو چکی ہے۔وزیراعلیٰ نے 15,000 سپر سیڈرز کا ہدف مقرر کیا ہے، جس کی 60 فیصد قیمت حکومتِ پنجاب کسانوں کو سبسڈی کے طور پر فراہم کر رہی ہے۔
وفد کو بتایا گیا کہ پنجاب حکومت ماحولیاتی تحفظ کے لیے دنیا کی جدید ترین ٹیکنالوجی استعمال کر رہی ہے:
پنجاب کی تاریخ کی پہلی ‘کلائمیٹ چینج آبزرویٹری’ بنائی جا رہی ہے جو موسمیاتی تبدیلیوں کا ڈیٹا ہب ہوگی۔
تمام انڈسٹریل یونٹس کی 24 گھنٹے مانیٹرنگ کی جا رہی ہے اور فیلڈ افسران کو ‘باڈی کیمز’ سے لیس کیا گیا ہے۔
پنجاب کے تمام بھٹے زگ زیگ ٹیکنالوجی پر منتقل ہو چکے ہیں، جبکہ لاہور کے مالز اور ماڈل بازاروں کو مکمل طور پر پلاسٹک فری کر دیا گیا ہے۔
پنجاب سیف سٹی اتھارٹی کے ذریعے آلودگی پھیلانے والے عناصر کی نگرانی کی جا رہی ہے۔
امریکی وفد نے ای پی اے کے ‘ائیر کوالٹی مینجمنٹ سسٹم’ کا معائنہ کیا اور لاہور کا لائیو AQI چیک کیا۔ وفد نے پنجاب اے کیو آئی (Punjab AQI) موبائل ایپ کی تعریف کی جس کے ذریعے شہریوں کو فضائی معیار کی لمحہ بہ لمحہ معلومات فراہم کی جاتی ہیں۔
مریم اورنگزیب کا کہنا تھا کہ پاکستان کی تاریخ میں کسی بھی حکومت نے ماحولیات پر اتنے بڑے پیمانے پر فنڈز فراہم نہیں کیے اور نہ ہی اتنی سنجیدگی سے کام کیا ہے، جتنا وزیراعلیٰ مریم نواز کی موجودہ ٹیم کر رہی ہے۔