واشنگٹن/لاس اینجلس: امریکا نے ہردیپ سنگھ نجر کے قتل کے کیس میں ایک اور اہم موڑ پر بڑی کارروائی کرتے ہوئے بھارتی جیل میں قید گینگسٹر لارنس بشنوئی اور اس کے قریبی ساتھی گولڈی برار پر سکھ علیحدگی پسند رہنما ہردیپ سنگھ نجر کے قتل کا حکم دینے کا باضابطہ الزام عائد کر دیا ہے۔
لاس اینجلس میں جاری ہونے والی ایک وفاقی چارج شیٹ میں انکشاف کیا گیا ہے کہ لارنس بشنوئی نے تین سال قبل 18 جون کو کینیڈا کے علاقے برٹش کولمبیا میں ہردیپ سنگھ نجر کے قتل کا منصوبہ تیار کیا اور اس پر عمل درآمد کا حکم دیا۔ اس کیس کے سلسلے میں امریکا، کینیڈا اور یورپ کی سیکیورٹی ایجنسیوں نے ایک مشترکہ اور مربوط کارروائی کی، جسے "آپریشن ہارڈ بال” کا نام دیا گیا ہے۔ اس آپریشن کے دوران دنیا بھر سے مجموعی طور پر 24 افراد کو گرفتار کیا گیا ہے، جن میں سے 11 گرفتاریاں کیلیفورنیا سے عمل میں آئی ہیں۔
امریکی حکام کا کہنا ہے کہ یہ گرفتاریاں ان تین بڑے منظم مجرمانہ گروہوں کے خلاف برسوں سے جاری تفتیش کا نتیجہ ہیں جو ریکیٹنگ، ٹارگٹ کلنگ، بھتہ خوری اور منشیات کی اسمگلنگ جیسے سنگین جرائم میں ملوث تھے۔ وفاقی عدالت میں پیش کی گئی چارج شیٹ میں کل 37 ملزمان کو نامزد کیا گیا ہے، جن میں وہ افراد بھی شامل ہیں جو بھارت کی جیلوں میں بیٹھ کر اپنا عالمی نیٹ ورک چلا رہے تھے۔
امریکی فرسٹ اسسٹنٹ اٹارنی بل ایسپلے نے ایک پریس کانفرنس سے خطاب کرتے ہوئے کہا کہ "قانون نافذ کرنے والے ادارے ان گروہوں کا قلع قمع کرنے کے لیے پرعزم ہیں۔ ان مجرموں کے لیے دنیا میں کوئی جگہ محفوظ نہیں ہے۔” ایف بی آئی کے اسسٹنٹ ڈائریکٹر پیٹرک گرانڈی نے کہا کہ ان گروہوں نے نہ صرف کمیونٹیز کو خوفزدہ کیا بلکہ کئی انسانی جانیں بھی ضائع کیں۔
یاد رہے کہ ہردیپ سنگھ نجر کا قتل بھارت اور کینیڈا کے درمیان سفارتی تعلقات میں شدید کشیدگی کی بڑی وجہ بنا تھا۔ کینیڈا کے وزیراعظم جسٹن ٹروڈو نے اس قتل میں نئی دہلی کے ملوث ہونے کا دعویٰ کیا تھا، جسے بھارت نے سختی سے مسترد کر دیا تھا۔ اب اس نئی امریکی پیشرفت کے بعد معاملہ ایک بار پھر عالمی توجہ کا مرکز بن گیا ہے۔
فی الحال لارنس بشنوئی بھارت کی جیل میں قید ہے، جبکہ گولڈی برار تاحال مفرور ہے۔ امریکی، کینیڈین اور یورپی ایجنسیاں مزید 10 مفرور ملزمان کی تلاش میں ہیں جن میں سے سات امریکا میں، دو بھارت میں اور ایک یورپ میں روپوش ہے۔ گرفتار ہونے والے افراد کی آج وفاقی عدالت میں پہلی پیشی متوقع ہے، جس سے اس کیس کے مزید اہم پہلوؤں اور نیٹ ورک کی تفصیلات منظر عام پر آنے کی توقع ہے۔
ہردیپ سنگھ نجر قتل کیس؛ امریکا کا بڑا ایکشن، لارنس بشنوئی اور گولڈی برار پر قتل کی چارج شیٹ عائد
