سیالکوٹ(سلیم احمد اعوان شیخو)
پاکستان مسلم لیگ ن کے ممبر صوبائی اسمبلی پنجاب فیصل اکرام نے اپنے حلقہ انتخاب جودھے والی ماڈل ویلج کا دورہ کیا اور جاری ترقیاتی منصوبوں اور میونسپل سروسز کا جائزہ لیا۔فیصل اکرام نے کہا کہ ماڈل ویلیج وزیر اعلیٰ پنجاب مریم نواز شریف کا تحفہ ہے ماڈل ویلیج سے گاؤں کے باسیوں کو معیاری سہولیات زندگی کی فراہمی میسر آئے گی۔ انہوں نے ماڈل ویلج میں عوامی سہولیات کو مزید بہتر بنانے کے لیے فوری اقدامات کی ہدایت کرتے ہوئے متعلقہ حکام کو اسٹریٹ لائٹس کی تنصیب کے لیے تخمینہ جلد از جلد تیار کرنے کی ہدایت کی۔ انہوں نے کہا کہ ماڈل ویلج میں بنیادی سہولیات کی فراہمی حکومت کی اولین ترجیحات میں شامل ہے اور عوام کو بہتر ماحول فراہم کرنے کے لئے تمام ضروری اقدامات کیے جائیں۔انھوں نے شفیع دا بھٹہ کے قریب بارشوں سے متاثرہ پل کی سائٹ کا بھی دورہ کیا۔ انہوں نے پل کی موجودہ صورتحال کا جائزہ لیا اور متعلقہ افیسران کو ہدایت کی کہ منصوبے سے متعلق فائل ورک فوری مکمل کیا جائے تاکہ تعمیراتی کام بلا تاخیر شروع کیا جا سکے۔انہوں نے محکمہ ہائی ویز اور محکمہ آبپاشی کے حکام کو ہدایت کی کہ باہمی رابطے کے ذریعے تمام انتظامی اور تکنیکی امور جلد از جلد نمٹائے جائیں تاکہ متاثرہ پل کی تعمیر کا کام فوری آغاز ہو اور شہریوں کو آمدورفت میں درپیش مشکلات سے نجات مل سکے۔حلقے میں ترقیاتی منصوبوں کی بروقت تکمیل اور عوام کو بہتر سہولیات کی فراہمی ان کی اولین ترجیح ہے۔اور اس سلسلے میں کسی قسم کی غفلت یا تاخیر برداشت نہیں کی جائے گی۔