مری (راشد مغل سے)
صوبائی وزیر برائے تعمیرات و مواصلات پنجاب ملک صہیب احمد بھرتھ نے کہا ہے کہ محرم الحرام خاص کر عاشورہ کے جلوسوں کے لیے موثر اور فول پروف سیکورٹی انتظامات یقینی بنانے جا رہے ہیں۔ محرم الحرام کے دوران امن و امان کی فضا برقرار رکھنے کے لیے تمام ادارے باہمی تعاون کو مزید مربوط بنائیں۔ ان خیالات کا اظہار انہوں نے بسلسلہ محرم الحرام انتظامیہ کی جانب سے کیے گئے اقدامات کا جائزہ لینے کے لیے مری کے دورے پر کیا۔ تفصیلات کے مطابق صوبائی وزیر برائے تعمیرات و مواصلات پنجاب ملک صہیب احمد بھرتھ بسلسلہ محرم الحرام سکیورٹی انتظامات کا جائزہ لینے مری پہنچ گئے۔ اس حوالے سے صوبائی وزیر کی زیر صدارت جناح ہال مری میں اجلاس منعقد ہوا۔ اجلاس میں ڈپٹی کمشنر مری آغا ظہیر عباس شیرازی، ڈی پی او مری رضا تنویر سپرا، اے ڈی سی آر عمر اویس کیانی، اے ڈی سی جی مری کامران صغیر، سی ٹی او مری منیر احمد ہاشمی سمیت دیگر محکموں کے افسران نے شرکت کی۔ ضلعی انتظامیہ کی جانب سے صوبائی وزیر کو محرم الحرام کے حوالے سے کیے جانے والے سیکورٹی انتظامات بارے بریفنگ دی گئی۔ ڈپٹی کمشنر مری آغا ظہیر عباس شیرازی نے ضلعی انتظامیہ کی جانب سے کیے گئے انتظامات، روٹس کی سیکیورٹی، اور ہنگامی حالات سے نمٹنے کے لیے کیے گئے اقدامات سے آگاہ کیا۔ بریفنگ میں بتایا گیا کہ سی سی ٹی وی کیمروں سے جلوسوں کے روٹس کی مؤثر نگرانی کی جائے گی۔ وزیر اعلیٰ پنجاب کے احکامات کی روشنی میں زائرین کے لیے سبیلیں لگائی گئی ہیں۔ ضلعی انتظامیہ، پولیس، ٹریفک پولیس، سول ڈیفنس سمیت تمام متعلقہ اداروں کے افسران اور اہلکار جلوسوں کے روٹس پر فرائص سر انجام دیں گے۔ اجلاس سے خطاب کرتے ہوئے صوبائی وزیر برائے تعمیرات و مواصلات پنجاب ملک صہیب احمد بھرتھ نے کہا کہ محرم الحرام خاص کر عاشورہ کے جلوسوں کے لیے موثر اور فول پروف سیکورٹی انتظامات یقینی بنانے جا رہے ہیں۔