مری (راشد مغل سے)
چیف ٹریفک آفیسر مری منیر احمد ہاشمی کے احکامات پر ڈی ایس پی ٹریفک مری غازی سہیل شہزاد نے 10 محرم الحرام کے موقع پر ضلع مری میں ٹریفک کی روانی برقرار رکھنے، شہریوں کی سہولت اور سکیورٹی انتظامات کو مؤثر بنانے کے لیے خصوصی ٹریفک پلان جاری کر دیا ہے۔
ٹریفک پلان کے مطابق 10 محرم الحرام، مورخہ 26 جون 2026 بروز جمعہ تریٹ کے مقام پر برآمد ہونے والے جلوس کے باعث راولپنڈی۔مری۔کشمیر روڈ (RMK Road) دن 01:00 بجے سے اختتامِ جلوس تک ٹریفک کے لیے بند رہے گی۔
اسی طرح سکیورٹی اور ٹریفک مینجمنٹ کے پیش نظر بوقتِ ضرورت نیو مری روڈ اور کوٹلی ستیاں روڈ پر موہڑہ سیداں، بھمروٹ سیداں، بن بازار تا سنگسیری بازار کے مقامات پر ٹریفک ڈائیورشنز نافذ کی جائیں گی۔
10 محرم الحرام کے روز لالہ زار ٹرن، سول ہسپتال مری، لوئر مال، مرحبا چوک اور امتیاز شہید روڈ پر دن 01:00 بجے سے اختتامِ جلوس تک کسی قسم کی گاڑی کو داخل ہونے کی اجازت نہیں ہوگی۔
عوام الناس کی سہولت کے لیے بانسرہ گلی، گھوڑا گلی، تریٹ بازار، سالگراں اور سترہ میل ٹول پلازہ پر ٹریفک وارڈنز اور افسران کی ڈیوٹیاں تعینات کر دی گئی ہیں تاکہ ٹریفک کو متبادل راستوں پر مؤثر انداز میں رواں رکھا جا سکے۔
سٹی ٹریفک پولیس مری شہریوں سے اپیل کرتی ہے کہ وہ مذکورہ اوقات کے دوران مری سے راولپنڈی اور اسلام آباد آمدورفت کے لیے مری ایکسپریس وے کو ترجیحی بنیادوں پر استعمال کریں اور ڈیوٹی پر موجود ٹریفک وارڈنز و افسران کی ہدایات پر مکمل عمل کریں تاکہ کسی بھی قسم کی دشواری اور ناخوشگوار صورتحال سے بچا جا سکے۔
چیف ٹریفک آفیسر مری منیر احمد ہاشمی نے کہا ہے کہ ٹریفک قوانین کی پابندی کرتے ہوئے ایک ذمہ دار اور مہذب شہری ہونے کا ثبوت دیں اور محرم الحرام کے دوران امن و امان کے قیام میں قانون نافذ کرنے والے اداروں کے ساتھ مکمل تعاون کریں۔
کسی بھی قسم کی ٹریفک معلومات، شکایت یا ہنگامی صورتحال کی صورت میں شہری ٹریفک ہیلپ لائن 1915 یا 051-9269200 پر فوری رابطہ کر سکتے ہیں۔