نواب شاہ (رپورٹ: نفیس آرائیں)
محرم الحرام کے سلسلے میں میئر شہید بینظیر آباد قاضی محمد رشید بھٹی، ڈپٹی کمشنر عبدالصمد نظامانی، ایس ایس پی سمیر نور چنہ، حیسکو حکام اور دیگر متعلقہ محکموں کے افسران نے امام بارگاہوں، مجالس اور جلوسوں کی گزرگاہوں کا دورہ کرکے صفائی ستھرائی، لائٹنگ، بجلی کی فراہمی اور سیکیورٹی انتظامات کا جائزہ لیا۔اس موقع پر میئر قاضی محمد رشید بھٹی نے متعلقہ محکموں کو محرم الحرام کے انتظامات مزید مؤثر بنانے کی ہدایت کی۔ ڈپٹی کمشنر عبدالصمد نظامانی نے کہا کہ محرم الحرام کے دوران امن و امان کے قیام اور بہترین انتظامات کو یقینی بنانے کے لیے تمام محکموں کا عملہ چوبیس گھنٹے فیلڈ میں موجود رہے گا۔ایس ایس پی سمیر نور چنہ نے کہا کہ مجالس اور جلوسوں کی سیکیورٹی کے لیے سخت اقدامات کیے گئے ہیں، جبکہ شہری کسی بھی مشکوک شخص یا شے کی اطلاع فوری طور پر پولیس ہیلپ لائن 15 پر دیں۔ حیسکو ایکسیئن مخدوم مدثر علی نے یقین دہانی کرائی کہ محرم الحرام کے دوران بجلی کی بلا تعطل فراہمی یقینی بنائی جائے گی۔