اب ویڈیوز ہوں گی سیکنڈوں میں تیار: فیس بک کے نئے اے آئی ٹولز نے تہلکہ مچا دیا

کیلے فورنیا :ٹیکنالوجی کی دنیا میں ایک اور اہم پیش رفت کے طور پر میٹا نے فیس بک پر مصنوعی ذہانت (اے آئی) پر مبنی نئے فیچرز متعارف کروا دئیے ہیں۔ ان اقدامات کا بنیادی مقصد صارفین کے لیے معلومات تک رسائی کو مزید آسان بنانا، مواد کی تخلیق کے عمل کو بہتر کرنا اور مجموعی طور پر پلیٹ فارم پر انگیجمنٹ میں اضافہ کرنا ہے۔ یہ تمام تبدیلیاں کمپنی کی اس وسیع حکمتِ عملی کا حصہ ہیں جس کے تحت وہ اپنے اے آئی سسٹم کو زیادہ موثر اور جدید بنانا چاہتی ہے۔
میٹا کی جانب سے متعارف کروائے گئے اے آئی موڈ کے ذریعے فیس بک کی سرچ کا انداز مکمل طور پر تبدیل کرنے کی کوشش کی گئی ہے۔ اس فیچر میں میٹا کا اے آئی سسٹم عوامی پوسٹس، گروپس اور ریلز میں موجود مواد کا تجزیہ کر کے صارفین کے سوالات کے براہ راست اور خلاصہ شدہ جوابات فراہم کرتا ہے۔اس طرح صارفین کو روایتی سرچ نتائج کے بجائے قدرتی زبان میں سوال پوچھنے اور کمیونٹی مباحثوں کی بنیاد پر تیار کردہ جوابات حاصل کرنے کی سہولت ملے گی۔
اس کے ساتھ ساتھ فیس بک نے تخلیقی صارفین کے لیے بھی کئی نئے ٹولز پیش کیے ہیں جن میں ویڈیوز میں کولاج کٹ آؤٹس اور مختلف ٹرانزیشن ایفیکٹس شامل ہیں۔ مزید یہ کہ اے آئی بیسڈ پری سیٹس بھی شامل کیے گئے ہیں جن کی مدد سے صارفین اپنی تصاویر اور ویڈیوز میں لباس، ہیئر اسٹائل اور ایکسیسریز جیسے انداز آسانی سے تبدیل کر سکیں گے۔
کریئیٹرز کی سہولت کے لیے کمپنی نے ایک اے ائی اسسٹنٹ بھی متعارف کروایا ہے جو انہیں پوسٹس کرنے کے بہترین اوقات، آڈینس کی مصروفیت اور مواد کی کارکردگی کے حوالے سے ذاتی نوعیت کی تجاویز فراہم کرے گا۔ اس فیچر کا مقصد صارفین کو زیادہ بہتر اور موثر مواد تیار کرنے میں مدد دینا ہے۔
ان تمام اپ ڈیٹس کے ذریعے میٹا فیس بک کو ایک زیادہ جدید، انٹرایکٹو اور کریئیٹر فرینڈلی پلیٹ فارم بنانے کی کوشش کر رہی ہے۔ اسی سلسلے میں کمپنی نے حال ہی میں فیس بک، انسٹاگرام اور واٹس ایپ کے لیے عالمی سطح پر سبسکرپشن پلانز بھی متعارف کرائے ہیں جن کی ابتدائی قیمت 3.99 ڈالر ماہانہ رکھی گئی ہے۔
ان پلانز کے ذریعے اضافی فیچرز تک رسائی دی جاتی ہے جبکہ زیادہ قیمت والے پیکجز میں مزید جدید اے آئی سہولتیں شامل کیے جانے کا امکان ہے۔