ملتان قادِرپوراں سے عبدالغفور ساجد کی رپورٹ
یونین کونسل متی تل نمبر 87 میں گزرنے والی نہر مقامی شہریوں اور مویشی پال حضرات کے لیے مسلسل پریشانی کا باعث بن گئی ہے۔ آج دوپہر بھی ایک جانور نہر کے پل کے نیچے پھنس گیا، جسے مقامی افراد نے اپنی مدد آپ کے تحت ریسکیو کیا۔علاقہ مکینوں کے مطابق نہر میں آئے روز جانور پھنس جاتے ہیں، جس کے باعث قیمتی مویشیوں کے ضائع ہونے کا خطرہ بڑھ گیا ہے۔ شہریوں کا کہنا ہے کہ متعلقہ محکمہ نہر اس سنگین مسئلے کے حل کے لیے کوئی مؤثر اقدامات نہیں کر رہا اور نہ ہی بروقت موقع پر پہنچ کر اپنی ذمہ داریاں ادا کرتا ہے۔ مقامی افراد اپنی جانوں کو خطرے میں ڈال کر نہر میں اترتے ہیں اور پھنسے ہوئے جانوروں کو نکالتے ہیں، تاہم شہریوں کا مؤقف ہے کہ یہ کام متعلقہ سرکاری اداروں کی ذمہ داری ہے۔ اہلِ علاقہ نے خدشہ ظاہر کیا ہے کہ اگر فوری اقدامات نہ کیے گئے تو مستقبل میں کوئی بڑا حادثہ بھی پیش آ سکتا ہے۔ انہوں نے اعلیٰ حکام اور محکمہ انہار کے ذمہ داران سے مطالبہ کیا ہے کہ نہر کے حساس مقامات کی نشاندہی کرکے مستقل حفاظتی انتظامات کیے جائیں، نگرانی کا مؤثر نظام قائم کیا جائے اور جانوروں کے پھنسنے کے واقعات کی روک تھام کے لیے فوری عملی اقدامات اٹھائے جائیں تاکہ کسانوں اور مویشی پال افراد کو مزید نقصان سے بچایا جا سکے۔