جھڈو( رپورٹ / قیصر راجہ راجپوت )
سندھ پنجابی اتحاد کی جانب سے حریم گارڈن جھڈو میں ایک عظیم الشان کنونشن کا انعقاد کیا گیا، جس میں سندھ کے مختلف شہروں سے تعلق رکھنے والے سیکڑوں افراد نے شرکت کی۔ پروگرام میں پنجابی برادری کے رہنماؤں، سماجی شخصیات اور معززین نے بڑی تعداد میں شرکت کرکے اتحاد و یکجہتی کا مظاہرہ کیا۔کنونشن سے خطاب کرتے ہوئے چوہدری غلام نبی آرائیں، چوہدری نواز سانسی، چوہدری شہباز گل، احسن گل، لیاقت علی ساہی، چوہدری کاشف ورک اور ممتاز جٹ نے کہا کہ پنجابی برادری 1880ء سے سندھ میں آباد ہے اور اس عرصے کے دوران ہمیشہ سندھ کی ترقی، خوشحالی اور حقوق کے لیے اپنا مثبت کردار ادا کرتی رہی ہے۔مقررین نے کہا کہ سندھ میں آباد پنجابی برادری نے ہر مشکل وقت میں سندھ کے عوام کے ساتھ کھڑے ہو کر اپنی وفاداری اور محبت کا ثبوت دیا ہے۔ انہوں نے اس عزم کا اظہار کیا کہ سندھ کی ترقی، امن، بھائی چارے اور بین الصوبائی ہم آہنگی کے لیے اپنی جدوجہد جاری رکھیں گے۔۔کنونشن کے شرکاء نے سندھ میں بین المذاہب اور بین الثقافتی ہم آہنگی کو فروغ دینے کے عزم کا اعادہ کرتے ہوئے سندھ پنجابی اتحاد کی کاوشوں کو سراہا اور تنظیم کے ساتھ بھرپور تعاون کا یقین دلایا۔