میکسیکو:فٹ بال کے سب سے بڑے میلے، فیفا ورلڈ کپ 2026 کے آغاز سے قبل ہی کولمبیا کی عالمی شہرت یافتہ گلوکارہ شکیرا نے ایک اور تاریخ رقم کر دی ہے۔ ان کا نیا آفیشل ترانہ "Dai Dai”، جو نائیجیرین ریپر برنا بوائے (Burna Boy) کے ساتھ مل کر تیار کیا گیا ہے، ریلیز کے چند دنوں کے اندر ہی 100 ملین سے زائد ویوز حاصل کر کے ایک نیا سنگ میل عبور کر چکا ہے۔
View this post on Instagram
شکیرا اور فٹ بال کا یہ رشتہ اب دو دہائیوں پر محیط ہو چکا ہے۔ 2006 میں جرمنی میں "Hips Don’t Lie” کی پرفارمنس سے شروع ہونے والا یہ سفر 2010 کے سدا بہار ترانے "Waka Waka” اور 2014 کے "La La La” سے ہوتا ہوا اب 2026 تک پہنچ چکا ہے۔ اس کامیابی کے ساتھ شکیرا وہ پہلی فنکارہ بن گئی ہیں جنہوں نے ورلڈ کپ کے چار مختلف ایڈیشنز میں مرکزی کردار ادا کیا ہے۔
ترانہ "Dai Dai” 11 جون کو میکسیکو سٹی میں ہونے والی افتتاحی تقریب میں پیش کیا جائے گا، جس کے فوراً بعد میزبان ملک میکسیکو اور جنوبی افریقہ کے درمیان ورلڈ کپ کا پہلا میچ کھیلا جائے گا۔ شکیرا کا کہنا ہے کہ یہ گانا محض ایک تفریحی سرگرمی نہیں بلکہ ایک پیغام ہے "میں فٹ بال کے ساتھ ایک ایسا رشتہ محسوس کرتی ہوں جو ناقابلِ شکست ہے۔ ہر ورلڈ کپ جادوئی ہوتا ہے اور میں چاہتی ہوں کہ یہ ترانہ دنیا بھر کے بچوں کے لیے امید کی کرن بنے۔”
شکیرا نے اعلان کیا ہے کہ اس گانے سے حاصل ہونے والی تمام تر آمدنی فیفا کے ‘گلوبل سٹیزن ایجوکیشن فنڈ’ کو عطیہ کی جائے گی، تاکہ دنیا بھر کے بچوں کو تعلیم اور کھیلوں تک رسائی حاصل ہو سکے۔
ورلڈ کپ کا یہ میلہ 11 جون سے شروع ہو کر 19 جولائی 2026 تک جاری رہے گا، جس کا فائنل میچ نیویارک نیو جرسی سٹیڈیم میں منعقد ہوگا۔