وزیراعظم شہبازشریف اورچین کے صدر شی جن پنگ کی ملاقات ، دونوں ممالک کی قیادت کادوطرفہ تعلقات کو مضبوط بنانے کے عزم کا اعادہ

بیجنگ :وزیراعظم محمد شہبازشریف اور صدر شی جن پنگ کی بیجنگ میں ملاقات میں دونوں ممالک کی قیادت نے دوطرفہ تعلقات کو مضبوط بنانے کے عزم کا اعادہ کیا۔چینی صدر نے عالمی امن کے لیےپاکستان کی کاوشوں اور تعمیری کردار کو سراہتے ہوئے نیک تمناؤں کااظہار کیا۔
پاکستان اور چین کے تعلقات محض سفارتی نہیں ۔دونوں ملک باہمی اعتماد، لازوال محبت اور مشترکہ ترقی پر مبنی اسٹرٹیجک شراکت دارہیں۔ سفارتی تعلقات کے قیام کے75سال مکمل ہونے پر وزیراعظم محمد شہبازشریف کا چین کا دورہ انتہائی اہمیت کا حامل ہے۔
وزیراعظم محمد شہبازشریف اور چین کے صدر شی جن پنگ کی بیجنگ میں ملاقات ہوئی ۔ملاقا ت کے دوران چین کے صدر شی جن پنگ نے کہا ہے کہ عالمی سطح پر تبدیلیوں کے باوجود پاکستان کیساتھ تعلقات ہماری ترجیح ہے۔دونوں ملکوں کی ناقابلِ شکست روایتی دوستی ،اسٹریٹجک باہمی اعتماد اور عملی تعاون نے ترقی میں اہم کردار ادا کیا ہے۔
صدرشی جن پنگ نے کہا کہ دونوں ملکوں نے ایک دوسرے پر اعتماد کیاہے۔ مشترکہ مستقبل اور علاقائی امن و استحکام کے لیے پاکستان اور چین کی سدابہار شراکت داری کو مزیدمستحکم کرنے کے لیے پرعزم ہیں ۔
وزیراعظم محمدشہبازشریف نے شاندار سفارتی شراکت داری کے 75 برس مکمل پر دونوں ملکوں کے عوام کو مبارکباد یتے ہوئے کہا کہ ہم مل کر دوطرفہ تعلقات مضبوط سے مضبوط تر بنائیں گے۔
محمدشہبازشریف نے کہا کہ صدرشی جن پنگ کی متحرک قیادت میں چین آج ایک اہم معاشی اور عسکری طاقت ہے ۔چین کے تجربات سے استفادہ کرتے ہوئے مختلف شعبوں میں اصلاحات کا عمل آگے بڑھا رہے ہیں ۔
وزیراعظم نے ہانگژو میں اپنی مصروفیات کا ذکر کرتے ہوئے کہا کہ صوبہ ژی جیانگ کی ترقی صدر شی جن پنگ کے وژن اور متحرک قیادت کا مظہر تھی۔ حقیقی قیادت بے لوث محنت، قربانی اور مسلسل جدوجہد کے بغیرعوام کے دلوں میں جگہ بنانے کا کوئی اور راستہ نہیں۔انہوں نے کہا کہ بہترین ٹیم کیساتھ ملکی ترقی کے لیے مصروف عمل ہیں۔