بجلی کے نادہندگان اور کنڈا مافیا کے خلاف بڑے پیمانے پر آپریشن

نواب شاہ (رپورٹ: نفیس آرائیں)

حیسکو نواب شاہ کی جانب سے رینجرز اور پولیس کی معاونت سے بجلی کے نادہندگان اور کنڈا مافیا کے خلاف بڑے پیمانے پر آپریشن کیا گیا، جس کے دوران درجنوں غیرقانونی کنکشن منقطع کرکے بجلی کی تاریں ضبط کر لی گئیں۔تفصیلات کے مطابق اے سی شہید بینظیر آباد اور ایکسین نواب شاہ کی ہدایات پر جاری خصوصی ریکوری مہم کے سلسلے میں اولڈ نواب شاہ کی یونین کونسل نمبر 5 میں چیئرمین آصف بروہی کے خصوصی تعاون سے کارروائی عمل میں لائی گئی۔ اس موقع پر رینجرز اور پولیس اہلکار بھی موجود تھے۔

آپریشن اولڈ نواب شاہ کے مختلف علاقوں، ڈبل روڈ، محلہ سعید آباد اور گردونواح میں کیا گیا، جس کی قیادت ایس ڈی او سب ڈویژن ون زمان بھٹی اور لیاقت ڈامرا نے کی، جبکہ یونین چیئرمین سید حبدار علی شاہ، خالد بھنگوار، ہاشم بروہی، رحمان زرداری، مقبول گپچانی اور سید ابرار شاہ بھی ٹیم کے ہمراہ موجود تھے۔کارروائی کے دوران سب ڈویژن ون کے مینٹیننس اسٹاف اور ڈی سی او اسٹاف نے مشترکہ طور پر ڈائریکٹ کنکشنز اور غیرقانونی کنڈا کنکشنز منقطع کیے، جبکہ ضبط شدہ تاروں کو تلف کر دیا گیا۔ حکام کے مطابق ریکوری مہم میں مزید تیزی لائی جا رہی ہے تاکہ بجلی چوری کی روک تھام کو یقینی بنایا جا سکے۔حیسکو حکام نے شہریوں سے اپیل کی ہے کہ وہ اپنے بجلی کے بل بروقت ادا کریں اور غیرقانونی کنڈا کنکشنز سے گریز کریں، بصورت دیگر ایسے عناصر کے خلاف کارروائیاں بلوں کی مکمل ادائیگی تک جاری رہیں گی۔