تہران نیٹ نیوز:ایران کے دارالحکومت تہران میں جلے ہوئے تیل کے گھنے سیاہ دھوئیں نے آسمان کو ڈھانپ لیا ہے، جس کے بعد شہر میں تشویش اور خوف کی فضا پھیل گئی ہے۔ فضا میں پھیلنے والی زہریلی آلودگی کے باعث شہری صحت کے سنگین خطرات سے دوچار ہو سکتے ہیں۔ ریڈ کریسنٹ حکام نے فوری وارننگ جاری کرتے ہوئے کہا ہے کہ اگر بارش ہوئی تو یہ زہریلے ذرات پانی کے ساتھ زمین پر آ سکتے ہیں، جس کے نتیجے میں مختلف بیماریاں پھیلنے اور ہلاکتوں کا خدشہ بھی موجود ہے۔ ماہرین کے مطابق فضا میں موجود آلودہ ذرات سانس کی بیماریوں، جلدی امراض اور دیگر خطرناک طبی مسائل کو جنم دے سکتے ہیں۔ دوسری جانب تہران میونسپلٹی نے شہریوں کو سختی سے ہدایت کی ہے کہ وہ بلا ضرورت گھروں سے باہر نہ نکلیں۔ شہریوں کو تاکید کی گئی ہے کہ وہ اپنے گھروں کے دروازے اور کھڑکیاں بند رکھیں تاکہ زہریلی فضا اندر داخل نہ ہو سکے۔ شہر کے مختلف علاقوں میں فضا دھند اور دھوئیں سے اس قدر بھر چکی ہے کہ سورج کی روشنی بھی مدھم پڑ گئی ہے۔ شہریوں کے چہروں پر پریشانی واضح دکھائی دے رہی ہے اور لوگ اپنے بچوں اور بزرگوں کی صحت کے حوالے سے شدید فکر مند ہیں۔ ماہرین ماحولیات کا کہنا ہے کہ اگر صورتحال جلد قابو میں نہ آئی تو اس کے اثرات نہ صرف انسانی صحت بلکہ پورے ماحولیاتی نظام پر بھی مرتب ہو سکتے ہیں۔
