قصور: اسپیکر پنجاب اسمبلی ملک محمد احمد خان نے کہا ہے کہ ملک دشمن عناصر اور دہشت گردی کے سامنے پاکستانی قوم کبھی نہیں جھکے گی بلکہ ڈٹ کر مقابلہ کرے گی۔ انہوں نے دو ٹوک الفاظ میں واضح کیا کہ "بنیان المرصوص” جیسے آپریشنز کے باوجود اگر سیاست کا محور فوج کو گالیاں دینا ہے، تو وہ ایسی سیاست کو تسلیم نہیں کرتے۔
اسپیکر پنجاب اسمبلی نے قصور ڈسٹرکٹ بار کا دورہ کیا جہاں انہوں نے "ملک علی محمد خان لائبریری” کا افتتاح کیا اور لیڈیز بار روم کا سنگ بنیاد رکھا۔ تقریب سے خطاب کرتے ہوئے انہوں نے بتایا کہ جب انہوں نے وکالت شروع کی تو یہاں صرف 300 وکلاء تھے اور سہولیات کے نام پر صرف "پھٹے” میسر تھے، جہاں بیٹھ کر انہوں نے اپنے اساتذہ سے کام سیکھا۔
انہوں نے اعلان کیا کہ بار کی بہتری کے لیے جو بھی فنڈ پروپوزل دیا جائے گا، وہ اسی سال فراہم کیا جائے گا اور قصور بار کو ایک ماڈل بار بنایا جائے گا۔
اسپیکر پنجاب اسمبلی ملک محمد احمد خان نے ملک کی اندرونی و بیرونی صورتحال پر گفتگو کرتے ہوئے اہم نکات اٹھائے:
انہوں نے کہا کہ فوج کے خلاف نفرت پھیلانے والی سیاست ملک کے لیے نقصان دہ ہے، پاکستانی قوم خوفزدہ ہونے والی نہیں ہے۔
اسپیکر نے زور دیا کہ عوام اور ریاست کا رشتہ صرف مضبوط بلدیاتی نظام سے ہی جڑ سکتا ہے۔ انہوں نے کہا کہ صرف 1500 افسران پورا صوبہ نہیں چلا سکتے، طاقت نچلی سطح تک منتقل کرنی ہوگی۔
انہوں نے مشورہ دیا کہ غیر ضروری اخراجات کم کر کے تمام وسائل وکلاء اور عوام کی فلاح و بہبود پر خرچ ہونے چاہئیں۔
ان کا کہنا تھا کہ بار کی معاونت کے بغیر بینچ (عدلیہ) کا اچھا پرفارم کرنا ممکن نہیں ہے۔ انہوں نے قصور بار میں پارکنگ سمیت تمام دیرینہ مسائل کو فوری حل کرنے کی یقین دہانی بھی کرائی۔