کراچی : پاکستان سٹاک ایکسچینج میں سوموار کے روز مندی کا رجحان ریکارڈ کیا گیا ہے اور 100 انڈیکس میں 3100 پوائنٹس تک کی کمی ریکارڈ کی گئی ہے۔
سٹاک مارکیٹ میں کاروبار آغاز سے ہی دباؤ کا شکار رہا اور انڈیکس میں مسلسل کمی ریکارڈ کی جاتی رہی اور ایک موقع پر انڈیکس 176735 پوائنٹس کی سطح تک گر گیا۔
پاکستان اسٹاک مارکیٹ میں مندی کے بارے تجزیہ کاروں کا کہنا ہے کہ اس مندی کی وجہ موجودہ مہینے میں بین الاقوامی مالیاتی فنڈ کی جانب سے پاکستان کے قرض پروگرام کے لیے نظر ثانی جائزہ ہے جس میں سرفہرست ملک میں بڑی کمپنیوں پر سپر ٹیکس کا معاملہ ہے۔
واضح رہے کہ وفاقی آئینی عدالت نے گذشتہ ماہ کمپنیوں پر سپر ٹیکس نافذ کرنے کے فیصلے کو قائم رکھا تھا۔
تجزیہ کار احسن محنتی نے بی بی سی اردو کو بتایا کہ اس وقت سپر ٹیکس کی مد میں حکومت نے بڑی کمپنیوں سے 300 ارب روپے تک وصول کرنے ہی جبکہ دوسری جانب وفاقی حکومت کا ٹیکس ٹارگٹ بھی ہے جسے آئی ایم ایف کی شرائط کے تحت پورا کرنا ہے۔
محنتی نے کہا کہ سٹاک مارکیٹ میں سرمایہ کار اس معاملے پر کافی فکر مند نظر آتے ہیں۔
اسٹاک ایکسچینج میں مندی کا رحجان، 100 انڈیکس میں 3100 پوائنٹس کی کمی
