سزا دینی ہے تو بلاامتیاز سب کو ملنی چاہئیے،احتساب سب کیلئے یکساں نہیں ، خواجہ سعد رفیق

لاہور: (بے نقاب رپورٹ)خواجہ سعد رفیق نے قومی منظرنامے پر گہری تشویش کا اظہار کرتے ہوئے کہا ہے کہ بدقسمتی سے اس ملک کو کبھی ایک مضبوط قوم بننے نہیں دیا گیا۔ ان کے مطابق جب بھی عوام اجتماعی شعور کی طرف بڑھتے ہیں، کوئی نہ کوئی واقعہ پورے عمل کو پیچھے دھکیل دیتا ہے۔
انہوں نے کہا کہ پاکستان مسلسل ایک ہی دائرے میں گھوم رہا ہے، جہاں ہم ایک منظم قوم کے بجائے محض ہجوم بن کر رہ گئے ہیں۔ سیاسی جدوجہد کرنے والوں کو نشانہ بنایا جاتا ہے، ان کی ضمانتیں ضبط ہوتی ہیں، جبکہ احتساب کا معیار سب کے لیے یکساں نہیں۔
رہنما پاکستان مسلم لیگ (ن) نے واضح کیا کہ اگر سزا دینی ہے تو پھر امتیاز کے بغیر سب کو برابر ملنی چاہیے۔ ان کا کہنا تھا کہ اس دائروں کے سفر سے نکلنے کے لیے پوری قوم کو سنجیدگی سے بیٹھ کر مشترکہ سوچ اپنانا ہوگی، ورنہ یہ بحران نسل در نسل منتقل ہوتا رہے گا۔
خواجہ سعد رفیق کے مطابق اصل مسئلہ افراد نہیں بلکہ نظام کی وہ سوچ ہے جو ہر تبدیلی کو جنم لینے سے پہلے ہی کچل دیتی ہے، اور یہی رویہ ملک کو آگے بڑھنے سے روک رہا ہے۔