بسنت کے بعد پتنگ بازی پر مکمل پابندی برقرار: قانون توڑنے والوں کے خلاف بلا امتیاز کارروائی کا حکم،بلال صدیق کمیانہ سی سی پی او

لاہور : بسنت فیسٹیول کے باقاعدہ اختتام کے باوجود صوبائی دارالحکومت میں پتنگ بازی پر پابندی برقرار رکھنے کا فیصلہ کیا گیا ہے۔
سی سی پی او لاہور بلال صدیق کمیانہ نے پولیس افسران کو سخت ہدایات جاری کی ہیں کہ شہر میں کائٹ فلائنگ ایکٹ پر سختی سے عملدرآمد یقینی بنایا جائے اور خلاف ورزی کرنے والوں کے خلاف کسی رعایت کے بغیر کارروائی کی جائے۔
سی سی پی او بلال صدیق کمیانہ نے تمام فیلڈ افسران کو حکم دیا ہے کہ وہ اپنے اپنے علاقوں میں پتنگ بازی کی نگرانی کے لیے پیٹرولنگ اور چیکنگ کا عمل تیز رکھیں۔ انہوں نے واضح کیا کہ قانون کی خلاف ورزی کرنے والوں کے خلاف بلا امتیاز کارروائی عمل میں لائی جائے گی اور اس سلسلے میں کسی بھی قسم کا دباؤ قبول نہیں کیا جائے گا۔
لاہور پولیس نے پتنگوں اور ڈور کی خرید و فروخت میں ملوث دکانداروں کو بھی آخری وارننگ جاری کر دی ہے۔ سی سی پی او کا کہنا ہے کہ غیر قانونی پتنگوں اور قاتل ڈور کی ترسیل و فروخت ایک ‘قابلِ دست اندازی جرم’ ہے اور اس میں ملوث افراد کے خلاف سخت قانونی دفعات کے تحت مقدمات درج کیے جائیں گے۔
پولیس چیف نے والدین سے بھی اپیل کی ہے کہ وہ اپنے بچوں کی سرگرمیوں پر کڑی نظر رکھیں اور انہیں اس خطرناک کھیل سے دور رکھیں۔ شہریوں کو متنبہ کیا گیا ہے کہ غیر قانونی پتنگ بازی نہ صرف قانون کی خلاف ورزی ہے بلکہ یہ قیمتی انسانی جانوں کے لیے بھی انتہائی مہلک ثابت ہو سکتی ہے۔
سی سی پی او لاہور نے اعادہ کیا کہ ان تمام اقدامات کا واحد مقصد شہریوں کی جان و مال کا تحفظ اور شہر میں امن و امان کی صورتحال کو برقرار رکھنا ہے۔